यातायात मजदुरको आन्दोलनमा १० करोडभन्दा बढीको मोवाइल लुटिएको दावी

२ फागुन, काठमाडौं । यातायात मजदुरहरुले सोमबार गरेको प्रदर्शनका क्रममा काठमाडौंका माछापोखरी र नयाँबसपार्क क्षेत्रका पसलहरुबाट १० करोडभन्दा बढी मूल्यको मोवाइल, घडी लगायत सामान लुटपाट भएको नेपाल मोवाइल व्यवसायी संघले दाबी गरेको छ ।

उग्र प्रदर्शनकारीहरुको हुल नयाँ बसपार्कभित्र रहेका पसलमा तोडफोडपछि प्रवेश गरेर मोवाइल लगायत सामान लुटपाट गरिएको दाबी संघको छ । संघका अनुसार ल्होत्से मलमा रहेका मोबाइल पसलहरुबाट बढी मोवाइल हराएका छन् ।

लुटपाटबाट ९ देखि १० करोड रुपैयाँ बराबरको क्षति भएको संघका उपाध्यक्ष समेत रहेका अर्जुन चालिसे बताए । मोबाइलको स्टोर रुम, पसल र सर्भिस सेन्टरबाट मोबाइल तथा तिनका पार्टपूर्जा लुटपाट भएको उनले बताए । लुटपाटको दृष्य सीसीटिभीमा देखिएको उनको दाबी छ । प्रहरीले घटनाबारे अनुसन्धान गरिरहेको जनाएको छ ।

मोबाइल पसलमा लुटपाट र तोडफोडको घटनाबारे मोबाइल व्यवसायीहरुले आज पत्रकार सम्मेलन गरेर घटनाको विस्तृत जानकारी दिने तयारी गरेका छन् ।

ट्राफिकले गर्दै आइरहेको सवारीसाधनमाथिको जरिवाना घटाउनुपर्ने, नियम यातायात व्यवसायी र मजदुरहरुको हितमा हुनुपर्ने लगायत माग राखेर सोमबार बालाजु क्षेत्रका सडकमा बस तेर्स्याएर गरिएको आन्दोलनका क्रममा ल्होत्सेका संचालक र कर्मचारीहरुले आन्दोलनकारीमाथि आक्रमण गरेपछि ल्होत्से मलमा तोडफोड भएको थियो । त्यसपछि उग्र बनेका आन्दोलनकारीहरुले प्रहरीको स्कार्पियो भ्यानमा आगजनी गरी नष्ट पारिदिएका थिए ।

आज बिहान भौतिक पूर्वाधार तथा यातायात मन्त्री नारायणकाजी श्रेष्ठको पहलमा भएको वार्तापछि आन्दोलित यातायात मजदुरहरुले उपत्यकाका ३ वटै जिल्लामा जारी राखेको यातायात बन्द फिर्ता लिएका छन् ।