द्रव्यशाह बहुमुखी क्याम्पसका प्रमुखमाथि हातपात

२ फागुन, गोरखा । गोरखाको लक्ष्मीबजारस्थित द्रव्यशाह बहुमुखी क्याम्पसका प्रमुख रामचन्द्र दुवाडीमाथि हातपात भएको छ । जनयुद्ध दिवसको विरूद्धमा हुने गरी दवाडीले सामाजिक सञ्जालमा पोष्ट गरेको सन्देशलाई लिएर अनेरास्ववियू (क्रान्तिकारी) क्याम्पस इकाइका विद्यार्थीहरुले मंगलबार बिहान उनीमाथि हातपात गरेका हुन् ।

इकाइ अध्यक्ष अनिष अर्याल नेतृत्वमा आएका विद्यार्थीहरुले क्याम्पस प्रमुखको कार्यकक्षमा रहेको टेबलसमेत तोडफोड गरेको बताइएको छ । आफूले संस्था नभई व्यक्तिगत विचार राखेको, तर त्यसैलाई आधार बनाएर आफूमाथि कुटपिट समेत भएको दुवाडीले बताए ।

दुवाडीले सामाजिक सञ्जालमा पोष्ट गरेको अभिव्यक्तिको विरोधमा क्रान्तिकारीको क्याम्पस इकाइले सोमबार राति विज्ञप्तिसमेत जारी गरेको थियो । कुटपिटपछि १२ घण्टाभित्र सार्वजनिक रुपमा माफी माग्न विद्यार्थीले चेतावनी दिएका छन् ।

जनयुद्ध दिवसको दिन हिजो फागुन १ गते सोमबार सरकारले सार्वजनिक बिदा दिएको थियो । जसकाे समर्थन र विराेध दुवै पक्षमा मत देखिएकाे छ ।