बालाजु घटनाबारे काठमाडौंका सीडीओले भने- घटनामा संलग्नलाई कारबाही हुन्छ

२ फागुन, काठमाडौं । काठमाडौं जिल्ला प्रमु्ख अधिकारी (सीडीओ) घनश्याम उपाध्यायले सोमबार बालाजुस्थित नयाँ बसपार्क र माछा पोखरी क्षेत्रमा भएको घटनाका दोषीलाई कारबाही हुने बाएका छन् । घटनामाथि प्रशासनले सुक्ष्म ढंगबाट छानबिन गर्ने उनले बताए ।

नयाँ बसपार्क भित्रको घटना र यातायात मजदुरले माछा पोखरीमा गरेको प्रदर्शनमा अवाञ्छित गतिविधि भएको उनको भनाइ छ ।

ल्होत्से बहुउद्देश्यीय प्रालिको व्यवस्थापनमा रहेको नयाँ बसपार्कमा सोमबार यातायात मजदुरले कार्यक्रम गर्न खोज्दा ल्होत्सेका महाप्रबन्धक सुनिल कुँवर सहितले आक्रमण गरेपछि झडपको अवस्था आएको मजदुर सङ्गठनहरूको दाबी छ । घटनाको सम्पूर्ण जिम्मेवारी ल्होत्सेका संचालक र कर्मचारीले लिनुपर्ने उनीहरुको भनाइ छ ।

फागुन १ मा माछा पोखरीमा मजदुरहरूले गरेको प्रदर्शनको क्रममा प्रहरीको २ वटा स्कार्पियो पिकअप भ्यान पल्टाएर आगजनी गरी ध्वस्त बनाएका छन् । एक समूहले ल्होत्से मलको मोबाइल पसल प्रवेश गरेर मोवाइल लुटपाट गरेका छन् । लुटपाटबाट १० करोड मूल्यको क्षति पुगेको नेपाल मोवाइल व्यवसायी संघका अध्यक्ष भरत भट्टराईले आज पत्रकार सम्मेलन गरेर जानकारी दिए ।

प्रदर्शनमा इन्स्पेक्टर शेरबहादुर बस्नेत सहित १७ जना प्रहरी घाइते भएका छन् । कुटपिट र आगजनीमा संलग्न जो कोहीमाथि कारबाही गरिने सीडीओ उपाध्ययाले बताए । लुटपाटकाे दृष्य मलमा राखिएका सीसीटीभीमा कैद भएका छन् । साे दृष्य सामाजिक संजालमा समेत पाेष्ट भइसकेका छन् ।

सामान्य गल्तीमा पनि ट्राफिकले १५०० रुपैयाँ जरिवाना तोकेर यातायात व्यवसायी र मजदुरलाई हैरानी दिएको भन्दै हटाउन माग गर्दै सोमबार यातायात मजदुरहरुले बालाजुको माछापोखरी क्षेत्रमा बस तेर्स्याएर आन्दोलन गरेका थिए ।