मोबाइल लुटपाट घटनामा संलग्नलाई कारबाही गर्न गृहको निर्देशन

२ फागुन, काठमाडौं । बालाजुमा सोमबार साँझ भएको यातायात मजदुरको आन्दोलनका क्रममा ल्होत्से मलमा रहेका मोबाइल पसलमा भएको लुटपाट घटनाको छानबिन गरेर दोषीलाई कारबाही गर्न गृह मन्त्रालयले प्रहरीलाई निर्देशन दिएको छ ।

मंगलबार गृह सचिव विनोद प्रकाश सिंहले प्रहरी आइजिपी धिरजप्रताप सिंहलाई फोन गरी यस विषयलाई गम्भीरतापूर्वक अनुसन्धान गर्न निर्देशन दिएको प्रवक्ता एवं सहसचिव जितेन्द्र बस्नेतले जानकारी दिए । लुटपाटमा संलग्न सबैलाई पक्राउ गर्न भनिएको छ । पसल फोडेर मोवाइल लुटपाट भएको घटनालाई गम्भीरतापूर्वक अनुसन्धान गर्न निर्देशन दिएको बस्नेतले बताए ।

ट्राफिक प्रहरीको जरिवाना र ज्यादतिविरुद्ध सोमबार यातायात मजदुरले गरेको आन्दोलनका क्रममा एक समूहले मलभित्र संचालित मोवाइल पसलमा पसेर मोवाइल लुटेर भागेका थिए ।

मोवाइल व्यवसायीहरुले लुटपाटबाट १० करोड रुपैयाँको क्षति पुगेको दाबी गरेका छन् । नेपाल मोवाइल व्यवसायी संघका अध्यक्ष भरत भट्ट्राईले आज राजधानीमा पत्रकार सम्मेलन गरी क्षतिबारे जानकारी दिँदै दोषीलाई कारबाही गर्न क्षतिपूर्ति दिन राज्यसँग माग गरेका छन् ।

यस्तै आजै मात्र काठमाडौंका सीडीओ घनश्याम उपाध्यायले लुटपाट र प्रहरीको भ्यानमा आगो लगाउनेहरुको पहिचान गर्ने काम भइरहेको बताउँदै संलग्न सबैलाई कारवाहीको दायरामा ल्याइछाड्ने बताएका थिए ।

लुटपाटमा संलग्नलाई चोरी डकैती कसुर र भ्यान जलाउनेहरुलाई आगजनी अभियोगमा पक्राउ गर्ने प्रहरीले तयारी गरेको छ । लुटपाटको दृष्य मल परिसर र पसलमा राखिएका सीसीटीभीमा कैद भएको देखिएको छ । सोही आधारमा दोषीको पहिचान गर्ने भइरहेको बताइएको छ ।