डीआईजी सिंहविरुद्ध अख्तियारमा उजुरी

३ फागुन, काठमाडौं । प्रहरी नायव महानिरीक्षक (डीआईजी) अशोक सिंहविरुद्ध अख्तियार दुरुपयोग अनुसन्धान आयोगमा उजुरी परेको छ ।

एआईजी बढुवा प्रक्रियामा सिंहले जन्ममिति, शैक्षिक योग्यताको प्रमाणपत्र र नागरिकतामा उल्लेख उमेर नक्कली बनाएको दाबीसहित अख्तियारमा उजुरी परेको हो । नागरिकता जारी भएको मिति लगायत सम्पूर्ण कागजात झिकाई अनुसन्धान गर्न उनले माग गरेका छन् ।

सुदूरपश्चिम प्रदेश प्रहरी प्रमुखको जिम्मेवारी सम्हालिरहेका सिंहले जन्म मिति सच्याउँदै नक्कली शैक्षिक योग्यताको प्रमाण पेश गरेर जागिर खाएको जिकिरसहित छानबिन गर्न बुधबार अख्तियारमा दर्ता भएको उजुरीमा उलेख छ ।

सिंहविरुद्ध यो उजु्री काठमाडौंको बागबजारका विश्वप्रकाश भेटवालले दिएका हुन् । उजुरीमा सिंहले भारतीय शैक्षिक प्रमाणपत्र पेस गरेर जागिर खाएको दाबी गरिएको छ। गृहसचिवसमेत रहेका भाइ विनोदप्रकाश सिंह नै ५७ वर्ष पुगिसकेकाले अशोक सिंह ५८ नाघिसकेको दाबी उजुरीमा गरिएको छ ।

उजुरीमा सिंहले प्रहरी निरीक्षकमा नियुक्ति लिँदा पेस गरेको शैक्षिक प्रमाण पत्र नक्कली भएको पनि जिकिर गरिएको छ। भारतको लखनउस्थित कलेजमा पढेको भनिएको शैक्षिक प्रमाण पत्र नै नक्कली रहेको उजुरी छ । सिंहको शैक्षिक प्रमाणपत्रमा उल्लेखित उनले पढ्दै नपढेकाले त्यो शैक्षिक प्रमाणपत्र नक्कली भएको दाबी छ । उक्त प्रमाणपत्र नेपालभित्र कुनैपनि संस्थासँग पुनजाँच नगरिएको दाबी उजुरीमा छ ।

काठमाडौं प्रहरी प्रमुख समेत भइसकेका सिंहमाथि भेटवालले उमेर सच्याएको आरोप लगाएका छन् । उमेर सच्याएकै कारण सिंह पदमा रहेको दाबी गर्दै वास्तविक उमेरले उनी ५६ वर्षे उमेर हद पार गरेर अवकाश भइसक्ने दाबी गरिएको छ ।

गृहसचिव विनोदप्रकाश सिंहले आफैं बढुवासमितिको संयोजक बसेर भाइ नाता पर्ने अशोक सिंहलाई एआईजीमा बढुवा गर्न लागिपरेको भन्दै उनले स्वार्थको द्वन्द्व खेल खेलिरहेको बताएका छन् । उजुरीमा मुख्यसचिव, गृह मन्त्रालय र प्रहरी महानिरीक्षकलाई समेत बोधार्थ दिइएको छ ।