बालाजुमा प्रहरीको गाडी आगजनीमा संलग्नमध्ये काे काे पक्राउ परे ?

३ फागुन, काठमाडौं । सोमबार बालाजुस्थित माजापोखरी क्षेत्रमा प्रहरीको दुई वटा गाडी जलाउने, प्रहरीको अस्थायी बिट तथा ट्राफिक आइल्याण्डमा तोडफोडमा संलग्नमध्ये प्रहरीले ९ जनालाई पक्राउ गरी सार्वजनिक गरेको छ ।

विभिन्न स्थानबाट पक्राउ परेका उनीहरुलाई बुधबार जिल्ला प्रहरी परिसर काठमाडौंले पत्रकार सम्मेलन गरेर सार्वजनिक गरेका हो ।

सोमबार भएको यातायात मजदुर आन्दोलनका क्रममा तोडफोड गर्नेमध्ये उनीहरू पक्राउ परेका र उनीहरूलाइ सार्वजनिक गरिएको परिसर प्रमुख एसएसपी दानबहादुर कार्कीले जानकारी दिए ।

उनका अनुसार पक्राउ पर्नेमा तारकेश्वर बस्ने उदयपुरका विक्रम राई, बानियाटार बस्ने नुवाकोटका रामहरि भण्डारी, सोही ठाउँ बस्ने लमजुङका विवेक श्रेष्ठ, बालाजु बस्ने काभ्रेका राजेश तामाङ, गंगाहल बस्ने काभ्रेकै आशिष खडका, गोंगबु बस्ने प्युठानका दीपेन्द्र पुन मगर लगायत रहेका छन् ।

पक्राउ परेकाहरु उपर मुलुकी अपराध संहिता २०७४ को परिच्छेद २६ को दफा २८५ बमोजिम ३ दिन म्याद थप गरेर अनुसन्धान भइरहेको पत्रकार सम्मेलन जानकारी दिइयो । सो घटनामा संलग्नताको आशंकामा अन्य १० जनामाथि पनि सोधपुछ भइरहेको र सोधपुछ सकेपछि सार्वजनिक गरिने उनले बताए ।

आन्दोलनका क्रममा सुरक्षामा खटिएका प्रहरी बोकेका प्रहरी वृत्त बालाजुको निलो रंगको बा २ झ १४४ नम्बरको स्करपियो पिकअप भ्यानमा र बा १ झ ७२२४ नम्बरको माज्दा गाडी आगो लगाएर ध्वस्त पारिएको थियो । त्यसपछि प्रहरीको अस्थायी बिट र सवारीसाधन नियमनका लागि चोकमा राखिएको ट्राफिक आइल्याण्ड तोडफोड गरेर नष्ट पारिदिएका थिए ।

आगजनी र तोडफोड घटनामा सयौं संख्याका युवा पंक्ति सामेहल भएको भिडियो सामाजिक संजालमा आइसकेको छ ।

सोही दिन एक समूहले नयाँ बसपार्कभित्र रहेको ल्होत्से मलमा प्रवेश गरेर मोवाइल पसलबाट मोलाइल लुटपाट गरेको थियो । लुटपाटबाट १० हरोडभन्दा बढी मूल्यको क्षति भएको नेपाल व्यवसायी संघका अध्यक्ष भरत भट्टराईले दाबी गर्दै आएका छन् ।

आजै मा बालाजु घटनाको निष्पक्ष छानबिन गरी दोषीलाई कारबाही गर्न प्रधानमन्त्री प्रचण्डले प्रहरी प्रमखुलाई निर्देशन दिएका छन् । गृह मन्त्रालय प्रधानमन्त्रीले सम्हालिरहेका छन् ।