प्रहरीको गाडी आगजनीमा संलग्नताकाे आशंकामा १ महिलासहित थप २ जना पक्राउ

४ फागुन, काठमाडौं । बालाजुको माछापोखरीमा भएको प्रदर्शनमा प्रहरीको गाडी आगजनीमा संलग्नताको आरोपमा प्रहरीले एक महिलालाई पक्राउ गरेको छ । जलाएको आरोपमा प्रहरीले थप दुईजनालाई पक्राउ गरेको छ ।

उनीहरुलाई पक्राउ परेका अभियुक्तहरुको बयानका आधारमा बुधवार साँझ पक्राउ गरिएको हो । पक्राउ पर्नेमा आगजनी क्षेत्रमा पसल गर्दै आएकी संगीता परिषर रहेकी छन् । उनले आन्दोलनकारीसँगै मिलेर प्रहरीको गाडीमा आगो लगाएकी पाइएको प्रहरीको दाबी छ । उनीसँगै एक जना पुरुषलाई पनि पक्राउ गरिएको छ । पक्राउ पर्नेमा नुवाकोटका रन्जित कुमार तामाङ रहेका छन् ।

योसँगै आगजनी घटनामा संलग्नमध्ये ११ जनालाई प्रहरीले पक्राउ गरेको छ । सामाजिक संजालमा आइको भिडियोअनुसार सोमबार दिउँसो बालाजुको माछापोखरी क्षेत्रका सडकमा राकिराखेको २ वटा प्रहरीको गाडीमा गरिएको उक्त आगजनीका दर्जनौं युवा पंक्ति संलग्न रहेको देखिएको छ । अन्यको पहिचान गर्ने क्रम जारी रहेको प्रहरीले जनाएको छ । ९ जना पुरुषलाई घटनामा संलग्नताको आरोप सोमबार र मंगलबार पक्राउ परिसकेका छन् । उनीहरुलाई बुधबार सार्वजनिक गरिएको थियो ।

घटनामा संलग्न कसैलाई छुट नदिन र जनधनको सुरक्षाको ग्यारेन्टी गर्न गहृमन्त्रालय समेत सम्हालिरहेका प्रधानमन्त्री प्रचण्डले बुधबार नै सुरक्षा निकायका प्रमुखलाई बैठक राखेर निर्देशन दिइसकेका छन् ।

पक्राउ परेकाहरूविरुद्ध मुलुकी अपराध संहिता–२०७४ को परिच्छेद २६ को दफा २८५ अनुसार आपराधिक उपद्रव गर्न नहुने कसुरमा मुद्दा दर्ता गरेर अनुसन्धान भइरहेको काठमाडौंका एसएसपी दान बहादुर कार्कीले बताए ।