नुवाकोटमा बस दुर्घटनामा मृत्यु हुनेकाे संख्या ३ पुग्यो, एककाे पहिचान खुलेन

४ फागुन, काठमाडौं । आज दिउँसो नुवाकोटको चैनपुरमा भएको बस दुर्घटनामा परी मृत्यु हुनेको स्ंख्या ३ पुगेको छ । दिउँसो ४ बजे बट्टारबाट दाम्चेतर्फ जाँदै गरेको बा २ ख ८४५ नम्बरको बस बिदुर नगरपालिका–१२ स्थित चैनपुरमा दुर्घटनामा परेको थियो । ३५ जना यात्रु बोकेको बस सडकबाट १० मिटर तल पल्टिएको थियो ।

मृत्यु हुनेमा २ जना पुरुष र एक महिला रहेको प्रहरीले जनाएको छ । मृत्यु हुनेमा सोही नगरपालिका-३ का ६३ वर्षीय बाबुराम दर्जी र सोही स्थानका ७८ वर्षीय रामप्रसाद अर्याल रहेको प्रहरीले जनाएको छ । मृत्यु हुने महिलाको भने पहिचान हुन नसकेको जिल्ला प्रहरी कार्यालय नुवाकोटका डीएसपी खगेन्द्र खड्काले बताए ।

अन्य २३ यात्रु घाइते भएका छन् । घाइतेहरूको जिल्ला अस्पताल नुवाकोटमा उपचार भइरहेको छ । बसका चालक भने फरार रहेका छन् ।