आईओसीबाट घटेर आयो पेट्रोलियम पदार्थको मूल्य

४ फागुन, काठमाडौं । भारतको इण्डियन आयल कर्पोरेशन (आईओसी)ले पेट्रोलियम पदार्थको मूल्य घटेको सूची पठाएको छ । प्रत्येक १५/१५ दिनमा इण्डियन आयल कर्पोरेशनले नेपाल आयल निगमलाई मूल्यसूची उपलब्ध गराउँदै आएको छ । यसअनुसार, आज १६ तारिखमा नयाँ मूल्य सूची आएको हो । नयाँ मूल्यसूचीअनुसार पेट्रोलको मूल्य प्रतिलिटर १ रुपैयाँ ९७ पैसा रुपैयाँ घटेर आएको छ ।

यस्तै, डिजेलको मूल्य प्रतिलिटर साढे ६ रुपैयाँ आसपास घटेर आएको निगमले जनाएको छ । हाल नेपाली बजारमा पेट्रोलको मूल्य प्रतिलिटर १७८ र डिजेलको मूल्य प्रतिलिटर १७५ रुपैयाँ छ ।

पन्ध दिन अघि मात्र आईओसीले पेट्रोलमा प्रतिलिटर ८ रुपैयाँ बढाएर पठाउँदा नेपाल आयल निगमले नेपाली बजारमा भाउ बढाएको थियो । योपटक भने घटेर आएको छ ।