सरकारमा बसेकाले शवमा पनि व्‍यापार गरेका छन् : पूर्वप्रधानन्यायाधीश कार्की

५ फागुन, काठमाडौं । पूर्वप्रधानन्यायाधीश सुशीला कार्कीले सरकारमा धेरै संख्ष्यामा व्यापारी पुगेको र उनीहरुले शिक्षा, स्वास्थ्यमा व्यापार गरिरहेको आरोप लगाएकी छिन् ।

शुक्रबार डिल्लीबजार कन्या बहुमुखी क्याम्पसको वार्षिकोत्सव कार्यक्रममा बोल्दै उनले सरकारमा बस्नै सबै व्यापारीहरु पुगेको र तिनीहरुले शवमा समेत व्यापार गरिरहेका गम्भीर आरोप लगाइन् ।

‘अहिले देशको अवस्था विकराल बन्दै गएको, शिक्षामा व्यापार, स्वास्थ्यमा व्यापार, हरेक कुरामा व्यापार छ’ उनले भनिन्, ‘स्कलरशीप कसले पाउँछ, सरकारले दिने सहुलियत कसले पाउँछ त्यो पनि थाहा छैन । ‘

मुलुकमा अधिकांश नागरिक आर्थिक अवस्थामा कमजोर रहेको बताइन् । शिक्षा र स्वास्थ्यमा भइरहेको व्यापारकै कारण आर्थिक स्थिति कमजोर रहेका नेपालीहरुले छोराछोरीलाई आफूले चाहेको विधामा अध्ययन गराउन नसकेको उनले बताइन् ।

कमजोर अवस्थाकै कारण छोराछोरीले आफूले पढ्न चाहेको शिक्षामा इच्छा मारेर बस्नु परिरहेको बताउँदै कतिपयले घर जग्गा बेचेर पढाइरहेको र त्यसपछि काम नपाउँदा ऋणको तनावले मृत्युको बाटो रोज्न विवश हुनु परिरहेको बताइन् ।

अर्को प्रसंगमा कार्कीले आर्यघाटमा शवमाथि व्यापार हुँदा समेत सरकार आँखा चिम्लेर बसेको आरोप लगाइन् । शव जलाउने कार्यमा समेत व्यापार हुनु लज्जाको विषय भएको उनको भनाइ छ ।

‘‘आर्यघाटमा शव जलाउन त महंगो भइसक्यो । कसले सहयोग देला र दाहसंस्कार होला, लास जल्ला भन्ने भइसक्यो । समाजको अवस्था यहाँ पुगिसकेको छ ।’

नागरिकलाई सर्वसुलभ रुपमा स्वास्थ्य, शिक्षा, रोजगारीको प्रवन्त्र गर्न छाडेर अहिले दलहरु कुर्सीका लागि लडाइ गरिरहेको उनले बताइन् । शिक्षा र स्वास्थ्यलाई मात्र सरकारले जिम्मा लिएर नागरिकलाई सहज तुल्याउन सके मात्र राहत पुग्ने उनको विश्वास छ । नागरिक स्वयं जारगरूक हुनुपर्ने बेला आइसकेकाे उनकाे भनाइ थियाे ।

पर्यटन मन्त्री सुदन किरातीले पशुपति क्षेत्रमा फूल बेच्ने व्यापारीबाट पशुपति विकास कोषका पदाधिकारी, मन्त्रालयका सचिवदेखि मन्त्रीसम्मलाई घुस खुवाउनु पर्दा फूल महंगोमा बेच्नुपरिरहेको र आर्यघाटमा शवमा चढाउने माला उठाउँदै पटपकटक त्यही माला बिक्री गर्ने गरिएको खबर सुनेको भन्दै कारबाही गर्ने चेतावनी दिँदै आएका छन् ।