राष्ट्रपतिमा कांग्रेसलाई समर्थन गर्न प्रचण्डलाई कति सहज ? एमाले आफ्नै अडानमा

५ फागुन, काठमाडौं । नेपाली कांग्रेसका प्रवक्ता डा. प्रकाशशरण महतले राष्ट्रपति कांग्रेसको हुने वा नहुने भन्ने कुरा गौण रहेको बताएका छन् । राष्ट्रपति कांग्रेसको हुने वा नहुने भन्ने कुरा गौण रहेको तर संविधानको विषयमा कुन पार्टी कहाँ उभिने भन्ने कुरा प्रमुख रहेको महतले बताएका हुन ।

राष्ट्रपति निर्वाचनमा माओवादी केन्द्रले समर्थन जनाए पूर्ण कार्यकाल प्रधानमन्त्री पुष्पकमल दाहाल प्रचण्डलाई स्वीकार्ने उनले बताएका छन । महतले राष्ट्रपतिमा माओवादीले आफ्ना उम्मेदवारलाई समर्थन गरेको खण्डमा कांग्रेसले पनि ५ वर्ष नै प्रधानमन्त्री दाहाललाई समर्थन गरेर अघि बढ्नुपर्ने बताए ।

अहिलेको परिवेशमा नेपाली कांग्रेसकै उम्मेदवार राष्ट्रपतिमा सबैभन्दा स्वाभाविक हुने प्रवक्ता महतको दाबी छ । संविधान रक्षाका लागि कांग्रेसले प्रधानमन्त्रीलाई विश्वासको मत दिएको उल्लेख गर्दै उनले राष्ट्रपतिको पद महत्वपूर्ण भएको बताए । एमालेले राष्ट्रिय सहमति नचाहेको अवस्थामा प्रधानमन्त्रीले आफ्नो पार्टीले के निर्णय गर्ने भन्ने कुरालाई ध्यान दिन जरूरी रहेको उनले उल्लेख गरे ।

प्रवक्ता महतले राष्ट्रपति विद्यादेवी भण्डारीले संवैधानिक व्यवस्थाको बर्खिलापमा काम गरेको आरोप लगाउँदै आगामी दिनमा यस्ता गतिविधि नदोहोरिन गरी राष्ट्रपति बनाउनु पर्ने बताए । राष्ट्रपतिमा कांग्रेस उम्मेदवारलाई माओवादीले सघाए कांग्रेसले अहिले प्रधानमन्त्री दाहाललाई दिएको विश्वासको मत पाँच वर्षसम्म रहिरहने संकेत गरेकाे छ ।

यता सरकारले २६ पुषमा विश्वासको मत लिएदेखि प्रधानमन्त्री प्रचण्ड र एमाले अध्यक्ष केपी ओलीबीच निरन्तर भेटवार्ता भइरहेको छ तर, भेटमा प्रमुख एजेन्डा रहेको राष्ट्रपतिमा सहमति खोज्ने प्रयासमा भने ठोस प्रगति भएको छैन । आगामी २५ फागुनमा हुने राष्ट्रपति निर्वाचनका लागि १३ फागुनमा उम्मेदवारी दर्ता गर्नुपर्नेछ ।

पछिल्लो पटक बिहीबार मात्र भएको भेटवार्तामा पनि दुवै नेता आ–आफ्नै अडानमा देखिएका छन। दुई नेताबीच करिब दुई घन्टा लामो छलफल राष्ट्रपति निर्वाचन र मन्त्रिपरिषद्लाई पूर्णता दिने विषयमा केन्द्रित थियो । राष्ट्रिय स्वतन्त्र पार्टी सरकारबाट बाहिरिएपछि पाँच मन्त्रालयको जिम्मेवारी प्रधानमन्त्री प्रचण्डसँगै छ । निरन्तर रुपमा भइरहेको भेटमा ओलीले चाहि पूर्वसहमतिअनुसार राष्ट्रपति एमालेले पाउनुपर्ने र सहमति त्यसैमा हुनुपर्ने अडान राख्दै आएका छन ।

प्रचण्ड भने विगत नेकपाकालमा ओलीले सहमति कार्यान्वयन नगरेको र राष्ट्रपति विद्यादेवी भण्डारीको कार्यशैलीका कारण राष्ट्रिय सहमतिमा राष्ट्रपति चयन गर्नुपर्ने पक्षमा उभिएका छन् । माओवादीले कांग्रेस, एमाले, माओवादी, अन्य दल वा गैरराजनीतिक व्यक्ति जसको नाममा राष्ट्रिय सहमति हुन्छ, उही राष्ट्रपति हुने बताउँदै आएको छ ।