बकपत्र फेरेको आरोपमा ३ जनालाई भ्रष्टाचार मुद्दा दायर

५ फागुन, काठमाडौं । सरकारी साक्षीले बकपत्र फेरेको आरोपमा उनीहरुविरुद्ध अख्तियार दुरपयोग अनुसन्धान आयोगले विशेष अदालत काठमाडौंमा भ्रष्टाचार मुद्दा दायर गरेको छ ।

सरकारी साक्षी बनाएर अदालतमा पेश गरेकोमा उल्टो झुटो बकपत्र गरेको भनी समुन्द्र आचार्य, चिरञ्जिवी आचार्य र रत्न प्रसाद आचार्यविरुद्ध मुद्दा दायर गरेको हो ।

उनीहरु जलस्रोत तथा सिंचाई विकास डिभिजन कार्यालय, सिन्धुपाल्चोकका इञ्जिनियर भोगेन्द्र प्रसाद साह पक्राउ परेको घुसको घटनामा मुछिएका थिए । उनीहरु सबै जनालाई अख्तियारले अनुसन्धानका क्रममा सहयोग गरेको भनी सरकारी साक्षीका रुपमा पेश गरी सजाय छुटको प्रस्ताव गरेको थियो ।

तर अदालतमा पुगेपछि यथार्थ विवरण बताउनुपर्नेमा उल्टो बकपत्र गरेको भनी अख्तियारले मुद्दा दायर गरेको हो । अख्तियारले समुद्र आचार्य र चिरञ्जिवी आचार्यमाथि २९ हजार घुस खाएको आरोप लगाएको छ । साथै रत्नप्रसाद आचार्यमाथि ८५ हजार घुस लिएको आरोप छ ।