कांग्रेस सांसद भण्डारीको पहिलो सर्जरी सम्पन्न, दोस्रो अपरेसन अव्जरवेसनपछि मात्र निर्णय हुने

५ फागुन, काठमाडौं । ग्यास चुहिएर भएको आगलागीबाट घाइते भएका नेपाली कांग्रेसका सांसद चन्द्र भण्डारीको भारतको मुम्बईस्थित नेसनल बर्न्स सेन्टरमा पहिलो सर्जरी सफलतापूर्वक सम्पन्न भएको छ । उपचार समन्वयमा गएका नेपाली कांग्रेसका नेता योगराज कँडेलका अनुसार भण्डारीको दुवै खुट्टाको शल्यक्रिया गरिएको हो ।

मुख्य सर्जन डा. सुनील केसवानीलाई उद्धृत गर्दै कँडेलले भण्डारीक‍ो दायाँ खुट्टामा गहिरो घाउ रहेका कारण अपरेसनमा समय लागेको बताएका छन् । भण्डारीको दुवै खुट्टाको शल्यक्रियाका लागि करिब साढे २ घण्टा लागेको थियो ।

दायाँभन्दा बायाँ खुट्टाको घाउ कम रहेको चिकित्सकले जनाएका छन् । अहिले चिकित्सकहरूले निगरानी गरिरहेको छन् । दोस्रो अपरेसन गर्ने वा नगर्ने अव्जरवेसन पछि मात्र निर्णय हुने छ । थप उपचारका लागी सांसद भण्डारीलाई बिहीबार दिउँसो श्री एयरलाइन्सको चार्टर्ड विमानमार्फत मुम्बई लगिएको थियो ।

काठमाडौंको बुद्धनगरस्थित घरमा बुधबार राति साढे १० बजे ग्यास सिलिन्डर विस्फोट हुँदा भण्डारी र उनकी आमा जलेर घाइते भएका थिए । उनीहरूलाई बुधबार राति नै कीर्तिपुर अस्पताल लगिएको थियो । सांसद भण्डारीकी ८६ वर्षीया आमा हरिकला भण्डारीको भने बिहीबार बिहान उपचारका क्रममा कीर्तिपुर अस्पतालमा निधन भएको छ ।