सत्ता गठबन्धन ५ वर्ष टिक्ने मन्त्री पौडेलको दाबी

५ फागुन, धनगढी । नेकपा (एमाले)का उपाध्यक्ष समेत रहेका उपप्रधानमन्त्री तथा अर्थमन्त्री विष्णु पौडेलले अहिलेको अहिलेको सत्ता गठबन्धन ५ वर्ष टिक्ने दाबी गरेका छन् । उनले अहिलेको गठबन्धन काँचो धागोमा अडिएको अवस्था नभएको जिकिर गरे ।

नेकपा एमालेले मिसन ग्रासरुट अभियान अन्तरगत शुक्रबार धनगढीमा आयोजना गरेको प्रदेश स्तरीय अभिमुखीकरण कार्यक्रम सकेपछि निस्कने क्रममा सञ्चारकर्मीलाई संक्षिप्त प्रतिक्रिया दिँदै नेपालमा बढी नै हल्ला चल्ने गरिएको र त्यसलाई आधार बनाएर समाचार आउनु सही हुने बताए ।

‘नेपाली राजनीतिमा हल्ला एकातिर चल्ने, घटनाक्रम अर्कोतिरबाट जाने कुरा सबैलाई थाहा भएकै कुरा हो’ पौडेलले भने, ‘सरकारमा सहभागी रहेका दलहरुको सहायात्रामै राष्ट्रपति उपराष्ट्रपति चयन हुन्छ ।’

उनले राष्ट्रका साझा विषयमा दलहरुबीच सहकार्य भइरहने उनको भनाइ थियो । साझा विषयमा दलहरू एक ठाउँमा उभिन मुख्य अभिभारा रहेकाे उनले बताए ।

यही फागुन २५ मा हुन गइरहेको नयाँ राष्ट्रपतिको निर्वाचनमा कसलाई उम्मेदवार बनाउने भन्ने विषयमा सत्ता गठबन्धनका मुख्य दल एमाले र माओवादी केन्द्रबीच तिक्तता बढिरहेको छ ।

एमालेले पूर्वसहमति अनुसार आफूले उठाएको उम्मेदवारलाई सघाउन माओवादी केन्द्रसँग बाम्बार आग्रह गर्दै आइरहेको छ । तर माओवादी केन्द्रका अध्यक्ष समेत रहेका प्रधानमन्त्री प्रचण्ड राष्ट्रिय सहमति जुट्ने व्यक्तिलाई उम्मेदवार बनाउनुपर्नेमा अडान लिँदै आइरहेका छन् ।

दुई मुख्य दलबीच उम्मेदवारबारे मत भिन्नता देखिएपछि गठबन्धन फुट्ने अडकलबाजी सुरु भएको छ ।