ईसेवामार्फत ठगी गर्न के के बनाउँथिन् बहाना ?

५ फागुन, काठमाडौं । झुट्ठा बहाना बनाई अनलाइनमार्फत रकम ठगी गरेको आरोपमा काठमाडौं उपत्यका अपराध अनुसन्धान कार्यालयको टोलीले दुई युवती पक्राउ गरेको छ ।

प्रहरीका अनुसार हाल काठमाडौं महानगरपालिक–२२ खिचापोरी बस्‍ने भद्रपुर नगरपालिका–१० चन्द्रगढीकी ३२ वर्षीया दिपाञ्जली थापा भनिने उषा कार्की र खिचापोखरीमै बस्‍ने चितवन कालिका नगरपालिका–४ घर भई २० वर्षीया निकिता सुवेदी रहेका छन् ।

उनीहरुमाथि ठगी सम्बन्धी कसूरमा जिल्ला अदालतबाट म्याद लिई आवश्‍यक अनुसन्धान गरिने प्रहरीले जनाएको छ । दुवै जनालाई जिल्ला प्रहरी परिसर टेकु, काठमाडौं पठाइएको छ ।

उनीहरुले विभिन्न व्यक्तिलाई ‘फोन सम्पर्क गरी उच्च पदस्थ कर्मचारीको छोरी हुँ, एमबीबीएस टपर हुँ, विद्यालयमा शैक्षिक कार्यक्रम चलाउँछु्, विद्यार्थीहरुलाई खेलकुद सामग्री वितरण गर्ने गर्छु’ जस्ता बहानामा इसेवा वालेटमा अनलाइनमार्फत पैसा पठाउन लगाएको प्रहरीको आरोप छ ।

पैसा पाएपछि सम्पर्कविहीन हुन थालेपछि पीडितहरुले प्रहरीमा उजुरी दिएका थिए । उजुरीपछि लामो समयको खोजीपछाडि मात्र उनीहरुलाई पक्राउ गर्न सफल भएको प्रहरीले जनाएको छ ।