चितवन क्षेत्र नम्बर २ मा हुने उपनिर्वाचनका लागि दल दर्ता गर्न आह्वान

७ फागुन, काठमाडौं । निर्वाचन आयोगले चितवन क्षेत्र नम्बर २ मा हुने उपनिर्वाचनका लागि दल दर्ता गर्न आह्वान गरेको छ । यही फागुन १० गतेदेखि १६ गतेसम्म दल दर्ता गर्न सकिनेछ आयोगले जनाएको छ । राष्ट्रिय स्वतन्त्र पार्टी (रास्वपा)का सभापति रबि लामिछानेको सांसद पद खारेज भएपछि वैशाख १० मा उपनिर्वाचन हुँदैछ । उपनिर्वाचनमा नयाँ खुल्ने दलहरूले उपनिर्वाचनमा भाग लिन नपाउने आयोगले जनाएको छ ।

आयोगका अनुसार २०७९ फागुन ५ गतेसम्म निर्वाचन आयोगमा दर्ता भएका राजनीतिक दलले उपचुनावमा भाग लिन पाउनेछन् । राजनीतिक दलसम्बन्धी नियमावली २०७४ को अनुसूची १२ बमोजिमको ढाँचामा निर्वाचन आयोगको कार्यालयमा दल दर्ता निवेदन दिनुपर्ने आयोगको भनाइ छ । उपनिर्वाचनका लागि चैत २० गते उम्मेदवारको मनोनयन दर्ता गर्ने तालिका छ ।

चैत २१ गते उम्मेदवारको विरोधमा उजुरी, चैत २२ गते मनोनयन पत्र र उजुरीउपर जाँचबुझ गरी निर्णय दिने तथा उम्मेदवारको नामावली प्रकाशन गर्ने तालिका रहेको आयोगले जनाएको छ। चैत २३ गते उम्मेदवारलाई निर्वाचन चिन्ह प्रदान गर्ने कार्यक्रम छ । सोही निर्वाचनका लागि आयोगले यही फागुन १ गतेदेखि मतदाता नामावली दर्ताको प्रक्रिया चलाइसकेको छ ।

उपनिर्वाचनमा लामिछानेले पनि उम्मेदावरी दिने तयारी गरेका छन् । यसअघिका चुनावमा उनले निकटतम प्रतिद्वन्द्वी कांग्रेसका उमेश श्रेष्ठ भन्दा झण्डै ३ गुण बढी अर्थात ४९ हजार बढी मत ल्याएर संघीय सांसद विजयी बनेका थिए । पछि नागरिकता विवादमा मुद्दा परेको रिटमा सर्वोच्च अदालतले उनको नागरिकता खारेज गरिदिएपछि सांसद गुमेको थियो ।