रक्सी बेच्ने र खानेबाट उठाइएको जरिवानाबाट स्कूल भवन निर्माण

८ फागुन, काठमाडौं । बझाङमा स्थानीयले रक्सी बिक्री गर्ने र खानेलाई गरेको जरिवाना रकमबाट विद्यालय भवन निर्माण गरिएको छ । बझाङको सुर्मा गाउँपालिका–१० (साविकको दौलिचौर गाविस)मा रक्सी (मदिरा) बेच्ने र खानेमाथि गरिएको जरिवाना रकमले एक विद्यालय भवन निर्माण गरिएको हो ।

यो क्षेत्रमा सुरक्षाकर्मी पपरिचालन गर्दा समेत नियन्त्रणमा आउन नसकेपछि स्थानीय नै अघि सेर बेच्ने र खानेलाई धमाधम कारबाही गर्न सुरु गरेपछि मदिरा उत्पादन र प्रयोगमा निकै कमी आएको छ । सुरक्षाकर्मीसँगै स्थानीयको सक्रियताले कमी आएको स्थानीय बताउँछन् ।

मदिराको खुलेआम बिक्री वितरणले गाउँ नै अशान्त बनेपछि २०६७ दौलिचौरमा मदिरा नियन्त्रण गर्न गोरखबहादुर बोहराको अध्यक्षतामा मदिरा नियन्त्रण समिति बन्यो । समितिले मदिरा बेच्ने, सेवनलाई चर्को जरिवाना तोक्यो । सुरक्षाकर्मीलाई रक्सी खानेहरू समात्ने जिम्मेवारी दिइयो ।

उनको कार्यकाल २०६७ देखि २०७४ सालसम्ममा मदिराको जरिवानाबाट ३२ लाख रुपैयाँ सङ्कलन भएको थियो । सो रकममध्ये २५ प्रतिशत अर्थात ८ लाख रुपैयाँ स्थानीय दौलिचौर माध्यामिक विद्यालयलाई हस्तान्तरण गरियो । त्यही रकमले रकमले विद्यालयको पक्की भवन बनाइएको हो ।

गाउँमा मदिरासँगै क्यारेम, गुच्ची खेल्नेलाई पनि नियन्त्रणमा लिएर जरिवाना तिराएको थियो । मदिरा बेच्नेलाई रु २५ हजार, सेवन गर्नेलाई रु १० हजार, क्यारेमबोर्ड खेल्नेलाई रु १० हजार, गुच्ची खेल्नेलाई रु १५ सयका दरले जरिवाना गराउँदा ७ वर्षमा रु ३२ लाख रुपैयाँ संकल भएको थियो । जरिवाना रकमबाट अढाइ लाख रुपैयाँले विद्यालयमा मन्दिर र चौतारा, ३५ हजारको सोलार, २५ हजारको घेरबार, २० हजारको मन्दिरमा मूर्ति र घण्टीसहित दुई कोठे पक्की भवन बनाएको थियो । विद्यालयमा अहिले कक्षा १२ सम्मको पढाइ हुन्छ ।

सुर्मामा अहिले सबै मानिस काममा व्यस्त हुने र रातदिन आफ्नै काममा लागेका मान्छे भेटिने गरिएको बताउँदै स्थानीयले खुशी व्यक्त गर्छन् । गाउँ नै शान्त बनेको देख्दा उनीहरु दंग छन् ।