पोखराबाट काठमाडौं आइपुग्नेबित्तिकै प्रधानमन्त्रीले सुरु गरे पार्टीको पदाधिकारी बैठक

८ फागुन, काठमाडौं । प्रधानमन्त्री पुष्पकमल दाहाल‘प्रचण्ड’ले पोखराबाट काठमाडौं आइपुग्ने बित्तिकै पार्टी कार्यालय कोटेश्वरस्थित पेरिसडाँडामा पदाधिकारी बैठक सुरु गरेका छन् ।

पोखरामा उनी नेतृत्वको नेकपा (माओवादी केन्द्र)को गण्डकी प्रदेश समितिको छैटौं पूर्ण बैठकमा सहभागी भएर उनी ५ बजे मात्र काठमाडौं आइपुगेका हुन् ।बैठक सोमबार दिउँसो ४ बजे बस्न आइपुग्न ढिला भएका कारण बैठक ढिला सुरु भएको छ । बैठक अहिले जारी छ । बैठकमा राष्ट्रपति उम्मेदवारबारे छलफल हुने जनाइएको छ ।

यही २५ फागुनमा हुन गइरहेको नयाँ राष्ट्रपतिका लागि निर्वाचनका लागि १३ गते उम्मेदवारी दर्ता गर्ने निर्वाचन तालिका सार्वजनिक भइसकेको अवस्थामा दलहरुलाई उम्मेदवार टुंगो लगाउनुपर्ने बाध्यतामा परेका छन् । माओवादी केन्द्रले राष्ट्रिय सहमतिबाटै राष्ट्रपति चयन गर्नुपर्ने अडान राख्दै आएको छ । तर आजको बैठकले केही सचिलो निर्णय लिन सक्ने अनुमान गरिएको छ ।

उता नेकपा एमालेले भने प्रचण्ड प्रधानमन्त्रीमा नियुक्ति हुँदाका बखत भएको सहमति अनुसार राष्ट्रपतिमा एमालेलाई सघाउनुपर्ने अडान राख्दै आएको छ । सहमति उल्लंघन भएमा सरकार ढाल्नेसम्मको सकेंत दिइरहेको छ ।