अनेरास्ववियुले क्याम्पस भेलाबाट स्ववियुका सम्भावित उम्मेदवार चयन गर्ने

९ फागुन, काठमाडौं । एमालेनिकट अनेरास्ववियुले क्याम्पस भेलाबाट स्ववियुका सम्भावित उम्मेदवार छनौट गर्ने भएको छ । अनेरास्ववियुको पदाधिकारी बैठकले फागुन १३ गते स्ववियु निर्वाचन हुने क्याम्पसहरूमा विद्यार्थी भेला गरेर उम्मेदवार छनौट गर्ने निर्णय गरेको हो ।

फागुन १३ गते देशैभरिका स्ववियु निर्वाचन हुने क्याम्पसहरूमा भेला गरेर उम्मेदवारहरू छान्न प्रक्रिया सुरु गर्न केन्द्रले तल्ला कमिटीहरूलाई मापदण्डसहित निर्देशन दिइसकेको अनेरास्ववियुका अध्यक्ष समिक बडालले बताए । निर्देशनबमोजिम क्याम्पस भेला गर्ने र सम्भावित उम्मेदवारहरूको सूची संकलन गरेर केन्द्रमा पठाइने र केन्द्रले उम्मेदवारको टुङ्गो लगाउने विधि तय भएको उनले बताए ।

चैत ५ गतेका लागि तोकिएका स्ववियु निर्वाचनका लागि अनेरास्ववियुले तयारी तीव्रता दिएको छ । अध्यक्ष बडालको नेतृत्वमा निर्वाचन परिचालन मूल समिति बनेको छ ।उपाध्यक्षहरु नारायण घर्तीको नेतृत्वमा घोषणापत्र लेखन उपसमिति, उपाध्यक्ष गोविन्द गिरीको नेतृत्वमा प्रचार प्रसार उपसमिति, उपाध्यक्ष धर्म गिरीको नेतृत्वमा आर्थिक सहयोग उपसमिति तथा उपाध्यक्ष मर्यादा विष्टको नेतृत्वमा स्वयंसेवक परिचालन उपसमिति बनाइएको छ । बडाल हालै सम्पन्न २३औं महाधिवेशनबाट केन्द्रीय अध्यक्ष निर्वाचित भएका हुन् ।