राप्रपाले राष्ट्रपति चुनावमा भाग लिने कि नलिनेबारे कार्य सम्पादन समितिमा छलफल गर्ने

९ फागुन, काठमाडौं । सरकारमा सहभागी दल राष्ट्रिय प्रजातन्त्र पार्टी (राप्रपा)ले सन्निकट रहेको राष्ट्रपति निर्वाचनबारे छलफल गर्न पार्टीको कार्य सम्पादन समितिको बैठक बोलाएको छ ।

मुलुकमा संघीयता खारेज गर्ने र राजसंस्था फर्काउने एजेण्डा बोकेर राजनीति गरिरहेको राप्रपाभित्र राष्ट्रपति र उपराष्ट्रपति निर्वाचनमा भाग लिने वा बहिष्कार गर्ने भन्ने दुई धार देखिएको छ ।

यसबारे छलफल गरेर निर्णय लिन आउँदो शुक्रबारका लागि कार्य सम्पादन समितिको बैठक बोलाएको पार्टीका प्रवक्ता एवं प्रचार विभाग प्रमुख मोहन श्रेष्ठले बताए । राष्ट्रपतिको निर्वाचन फागुन २५ र उपराष्ट्रपति निर्वाचन चैत ५ गते हुँदैछ । राष्ट्रपति निर्वाचनका लागि फागुन १३ मा उम्मेदवारी दर्ता गर्नुपर्ने तनिर्वाचन तालिका छ । बैठक त्यसको एकदिन अगाडि बोलाइएको हो ।

निर्वाचनमा भाग लिने कि नलिने भन्नेबारे छलफल चलाइने भएपनि उम्मेद्वार नउठाउने विषय भने पक्का भएको छ ।

बैठकमा निर्णय लिने विषय कठिनाइ परे मतविभाजनबाट निर्णय लिनुपर्ने अवस्था आउन सक्ने वरिष्ठ उपाध्यक्ष बुद्धिमान तामाङले बताए । पार्टी अध्यक्ष राजेन्द्रकुमार लिङदेनसहितको एक टोली सरकारमा मन्त्री छन् । राप्रपाबाट मन्त्री बनेका धुव्रबहादुर प्रधान भने उम्मेदवार नउठाउने तर निर्वाचनमा भोटिङ प्रक्रियामा सहभागी हुनुपर्ने पक्षमा देखिएका छन् ।