उमेर विवादमा तानिएका डीआईजी सिंह राजीनामा दिने मनस्थितिमा

९ फागुन, काठमाडौं । उमेर विवादमा अख्तियार दुरुपयोग अनुसन्धान आयोगको छानविनमा परेका डीआईजी अशोक सिंह राजीनामा दिने तयारी मनस्थितिमा पुगेका छन् । उमेर विवादका कारण बर्खास्तमा पर्ने अवस्था देखिएपछि उनी त्यसअगावै राजीनामा दिने मनस्थितिमा पुगेका छन् ।

छानविन चलिरहेकै बेला प्रहरी महानिरीक्षक (आईजी) धीरजप्रताप सिंहलाई भेटेर उनले साे जानकारी दिइसकेको स्रोतको भनाइ छ । उनी कानूनी उपचारबारे परामर्शमा जुटेको समेत स्रोतको दाबी छ ।

सिंहको जन्म मिति २ थरी रहेको दाबीसहित बागबजारका एक स्थानीयले आयोगमा दुई पान्ने उजुरी हालेका थिए । सोही आधारमा आयोगले जन्म मितिबारे प्रहरी प्रधान कार्यालय र प्रहरी कितावखानालाई पत्र काटेर विवरण माग गरिसकेको छ ।

उनको २०४२ जेठ २२ गते जारी भएको नागरिकता प्रमाणपत्रमा मिति शीर्षकमा १८ वर्ष लेखिएको छ । तर २०५० मंसिरमा प्रहरीमा जागिरका लागि दिएका आवेदनमा जन्म मिति २०२५ पुस १६ गते उल्लेख रहेको पाइएपछि अनुसन्धानमा तानिएका हुन् । कीर्ते गरेको भने नदेखिएको स्रोतले जनायो ।

सिंहको नागरिकता अनुसार उनी डीआईजी बढुवा नै नहुनुपर्ने उजुरीकर्ताको जिकिर छ ।