रामचन्द्र पौडेललाई राष्ट्रपतिको उम्मेदवार बनाएर जाँदा राम्रो हुन्छ : महामन्त्री शर्मा

१० फागुन, काठमाडौं । नेपाली कांग्रेसका महामन्त्री समेत रहेका प्रतिनिधिसभा सदस्य विश्वप्रकाश शर्माले पूर्वप्रधानमन्त्रीलाई राष्ट्रपति पदमा उम्मेदवार बनाउन नहुने बताएका छन् ।

उनले बुधबार बसेको प्रतिनिधिसभाको बैठकपछि संसद भवन परिसरमा संचाकर्मीहरुसँग कुराकानी गर्दै महामन्त्री शर्माले मुलुककाे कार्यकारी पदमा पुगेर अधिकारी प्रयोग गरिसकेका कुनैपनि पूर्वप्रधानमन्त्रीहरुलाई राष्ट्रपतिको उम्मेदवार बनाउन नहुने बताए । राजनीतिक वृत्तबाटै उम्मेदवार बनाउँदा राम्रो हुने बताउँदै उनले एमाले अध्यक्ष केपी ओलीको आश्वसनमा नपर्न  पनि सुझाव दिए ।

‘कार्यकारी प्रमुख भएर अधिकार प्रयोग गरिसकेका कसैलाई आलंकारिक राष्ट्रपतिको उम्मेदवार बनाउन नहुने साथीहरुको मतमा मेरो पनि समर्थन छ’ उनले भने, त्यस्ता व्यक्तिले उम्मेदवारमा आकांक्षा राख्न पनि उचित हुँदैन ।’ तर शर्माले ५ पटक प्रधानमन्त्री भइसकेका कांग्रेस सभापति शेरबहादुर देउवालाई राष्ट्रपति बनाउन साथीहरुसँग छलफल चलाएको बताए । उनले वरिष्ठ नेता रामचन्द्र पौडेललाई उम्मेदवार बनाएर अगाडि जान सकिने बताए ।

‘मैले पार्टी सभपाति शेरबहादुर देउवा नै राष्ट्रपतिमा जाँदा बढी उचित हुन्थ्यो होला भनेको पनि हुँ’ उनले भने, उहाँ जाँदा पार्टीको संसदीय दलको नेता र पार्टी सभापति खाली हुन्छ, त्यसमा दलको नेताका रामचन्द्र पौडेल अगाडि सारेर र उपसभापति पूर्णबहादुर खडकालाई कार्यवाहक बनाएर पार्टीलाई गति दिन सकिन्छ भन्ने मलाई लाग्छ ।’ उनले थप भने, ‘आफूले भनेजस्तो भए यसअघि कसैले ढोक्सा थापेर गठबन्धन भत्काएको थियो त्यो पुनर्जीवित हुन्छ ।’

फागुन २५ मा हुने राष्ट्रपनि निर्वाचनका लागि यही फागुन १३ मा उम्मेदवारी दर्ताको मिति तय भएको छ । राष्ट्रपतिका उम्मेदवार कसलाई बनाउने भन्नेबारे दलहरुबीच छलफल व्यापक चलिरहेको छ ।