गठबन्धन परिवर्तन गर्ने निर्णयमा पुगिसकेका छैनौं : नारायणकाजी श्रेष्ठ

११ फागुन, काठमाडौं । नेकपा (माओवादी केन्द्र)का वरिष्ठ उपाध्यक्ष नारायणकाजी श्रेष्ठले पार्टी अहिलेको सत्ता गठबन्धन परिवर्तन गर्ने निर्णयमा पुगिनसकेको बताएका छन् ।

पार्टी अध्यक्ष समेत रहेका प्रधानमन्त्री पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधवकुमार नेपालबीच सिंहदरबारमा भएको भेटवार्ता सकिएपछि उनले संचारकर्मीहरुसँग यस्तो प्रतिक्रिया दिएका हुन् ।

भेटवार्तामा सहभागी भएका वरिष्ठ उपाध्यक्ष नारायणकाजी श्रेष्ठले राष्ट्रपति निर्वाचनको विषयमा सबै दलहरुसँग छलफल गर्ने क्रममा एकीकृत समाजवादीसँग पनि कुराकानी गरेको बताए । राष्ट्रपतिमा गठबन्धनबाट सहमतिमै उम्मेदवार बनाउने प्रयास अन्तिमसम्म जारी राख्ने उनले बताए ।