माओवादी केन्द्र, एकीकृत समाजवादी र जसपाले संयुक्त बैठक गर्ने

११ फागुन, काठमाडौं । सरकारको नेतृत्व गरिरहेको नेकपा (माओवादी केन्द्र), सरकार बाहिर रहेका जनता समाजवादी पार्टी (जसपा) र नेकपा (एकीकृत समाजवादी)ले संयुक्त बैठक गर्ने भएको छ । संयुक्त बैठक आजै सिंहदरबारमा बस्ने निधो भएको स्रोतको दाबी छ ।

राष्ट्रपति पदका लागि उम्मेदवारबारे ३ पार्टीबीच बैठक बसेर छलफल गर्न संयुक्त बैठक बेलुका ५ बजे आयोजना गर्ने निर्णय दलका शीर्ष नेताहरु सहमत भएका हुन् । प्रचण्ड र एकीकृत समाजवादीका अध्यक्ष माधवकुमार नेपालबीच केहीबेर अघि मात्र बैठक बसेका थिए ।

एकीकृत समाजवादीका नेताहरुले अध्यक्ष नेपाललाई राष्ट्रपति बनाउनुपर्नेमा जोड दिँदै आएका छन् । जसपाका अध्यक्ष उपेन्द्र यादवले उपराष्ट्रपति आफ्नो पार्टी पाउनुपर्ने दाबी गरेका छन् ।

संयुक्त बैठकपछि नेपाली कांग्रेससँग छलफल आजै बैठक गर्ने पनि ३ दलको तयारी छ । राष्ट्रपति निर्वाचनका लागि आउँदो शनिबार उम्मेदवारी दर्ताको तालिका रहेको छ । उता सरकारका सबैभन्दा ठूलाे दल एमालेले पनि राष्ट्रपति उम्मेदवारका लागि विभिन्न दलहरूसँग छलफल चलाइरहेकाे छ ।