माओवादी केन्द्र र जसपा नेताहरुबीच छुट्टै छलफल

११ फागुन, काठमाडौं । नेकपा (माअ‍ोवादी केन्द्र) र जनता समाजवादी पार्टी (जसपा) नेताहरुबीच अलग्गै भेटवार्ता सुरु भएको छ । यसअघि एकीकृत समाजवादीसहित ३ दलका नेताहरुबीच छलफल हुने भनिएको थियो ।

तर बिहीबार ५ बजे ३ दलबीचको छलफल हुने भनिएकामा त्यसअगावै दुई दलबीच सिंहदरबारमा अलग्गै छलफल सुरु भएको हो । यसपछि एकीकृत समाजवादीसँग त्रिपक्षी छलफल हुनेछ । छलफल राष्ट्रपति पदमा कसलाई उम्मेदवार बनाउने भन्नेबारे हुनेछ ।

सिंहदरबारमा भएको भेटमा माओवादी केन्द्रबाट अध्यक्षसमेत रहेका प्रधानमन्त्री प्रचण्ड, वरिष्ठ उपाध्यक्ष नारायणकाजी श्रेष्ठ र सचिव शक्ति बस्नेतलगायत सहभागी छन् ।

जनता समाजवादी पार्टीबाट अध्यक्ष उपेन्द्र यादव र नेता राजेन्द्र श्रेष्ठ सहभागी छन् । उनीहरुले राष्ट्रपति निर्वाचनको विषयमा छलफल गर्न लागेका हुन् ।

सोही विषयमा बिहीबार बिहानैदेखि दलका नेताहरुबीच दुई पक्षीय छलफल धेरै पटक भइसकेका छन् । त्रिपक्षीय छलफल सकेर आजै साँझ ६ बजे माओवादी केन्द्र, जसपा, एकीकृत समाजवादीले कांग्रेससँग छलफल गर्नेछन् ।