उच्च अदालतको आदेश बदरकाे माग गर्दै सन्दिप पुगे सर्वोच्च

११ फागुन, काठमाडौं । क्रिकेटर सन्दीप लामिछानेले विदेश यात्रा प्रतिबन्ध लगाउने उच्च अदालत पाटनको आदेश बदरको माग गर्दै सर्वोच्च अदालतमा रिट निवदेन दायर गराएका छन् ।

नाबालिगक बलात्कार मुद्दामा जिल्ला अदालतले थुनामा पठाएको आदेशविरुद्धको रिटमा गएको पुष २७ गते सुनुवाई गर्दै उच्च अदालत पाटनका न्यायधीसद्वय ध्रुवराज नन्द र रमेश ढकालको संयुक्त इजलासलेले सन्दीपलाई रिहाइको आदेश दिँदै विदेश यात्रा प्रतिबन्ध लगाएको थियो । उच्चले सर्तसहित २० लाख रुपैयाँ धरौटीमा रिहा गरेको थियो ।

उच्चको सोही आदेशले आफ्नो विदेश यात्राको अधिकारलाई संकुचित तुल्याएको भन्दै आदेश बदरको मागदाबीसहित सर्वोच्चमा बिहीबार रिट दायर गराएका हुन् ।

नेपालमा भर्खरै कीर्तिपुरमा सम्पन्न भएको त्रिदेशीय क्रिकेट सिरिजमा नेपाली टोलीबाट खेलेका उनी उच्चको आदेशकै कारण संयुक्त अरब इमिरेट्स (यूएई) भ्रमणमा जान रोक लागेको छ । रिटमा उनले विदेश यात्रामाथिको प्रतिबन्ध फुकुवा गर्न माग गरेका छन् । क्यानले आज सार्वजनिक गरेको यूएई जाने राष्ट्रिय टिमको सूचीमा सन्दिपको नाम समावेश छैन ।

मुद्दा अन्तिम टुंगो नलागेकै अवस्थामा राष्ट्रिय क्रिकेट टिममा फर्काएको भन्दै अधिकारीकर्मी र सरोकारवाालहरुले विरोध गर्दै आएका छन् ।