सन्दीपलाई थुनामै पठाउनुपर्ने सरकारी वकिलको जिकिर

१४ फागुन, काठमाडौं । नाबालिग बलात्कारको आरोपमा काठमाडौं जिल्ला अदालतमा मुद्दा खेपिरहेका क्रिकेटर सन्दीप लामिछानेलाई थुनामा पठाउने जिकिर सरकारी वकिलको तर्फबाट बहस गर्ने वकिलहरुले गरेका छन् ।

बलात्कारको मुद्दामा काठमाडौं जिल्ला अदालतले पुर्पक्षका लागि थुनामा पठाएका लामिछानेलाई धरौटीमा छाड्ने उच्च अदालत, पाटनको आदेशविरुद्ध सरकारले दिएको निवेदन र जेलबाहिर रहेका अभियुक्त लामिछानेले विदेश जाने अनुमतिका लागि दिएको निवेदन न्यायाधीश सपना मल्ल प्रधान र कुमार चुडालको संयुक्त इजलासको बन्द इजलासमा सुनुवाइ भइरहेको छ ।

बहसमा वकिलहरुले नाबालिगमाथि भएको जघन्य बलात्कारका अभियुक्तलाई मुद्दाको अन्तिम टुंगो नलाग्दासम्म थुनामै राख्नुपर्ने जिकिर गरेका छन् । उनीहरुले यस्तो मुद्दामा भएका उच्च र जिल्ला मात्र नभई सर्वोच्चकै नजिर हेर्नुपर्ने माग गरे । बहसका क्रममा सुरुमा सन्दीपका वकिलहरुले विदेश जाने अनुमतिबारे पहिले सुनुवाइ गर्न माग गरेपनि दिइएन ।

सरकारी वकिल महान्यायाधिवक्ता कार्यालयका सहन्यायाधिवक्ताद्वय सञ्जीव रेग्मी र सोमकान्त भण्डारीले बहस गरेका छन् । उनीहरुले उच्च अदालतको धरौटीमा छाड्ने आदेश त्रुटिपूर्ण भएकाले पुर्पक्षका लागि थुनामा राख्नुपर्ने उनीहरुले माग गरे । उनीहरुले कसको के योगदान छ भन्दा पनि अपराध के हो ? भन्ने विषयलाई हेर्नुपर्ने जिकिर गरे ।

सन्दीपले नाबालिग किशोरीलाई नगरकोट घुमाउन लगेको, छिटो फर्किन आग्रह गर्दा नमानेको, होटलमा एउटै कोठा मात्र बुक गरेको जस्ता घटनाले उनको नियत प्रष्ट हुने उनीहरुले तर्क गरे । परिस्थितिजन्य प्रमाण हेर्नुपर्ने उनीहरूकाे तर्क छ । खाजापछि सन्दीप पक्षका वकिलहरुको बहस सुनेर इजलासले आजै आदेश गर्ने संभावना छ ।