सरकारबाट एमालेलाई गलहत्याउने प्रकया शुरु, पुल्चोकमा मन्त्रीहरुको बैठक

१५ फागुन, काठमाडौं । प्रधानमन्त्री पुष्पकमल दाहाल ‘प्रचण्ड’ले नेकपा एमालेलाई सरकारबाट गलहत्याउने अघोषित प्रकृया शुरु गरेका छन् । संयुक्त राष्ट्रसंघीय मानव अधिकार परिषदको बैठकमा भाग लिन आइतवार साँझ जेनेभा जान लागेकी परराष्ट्रमन्त्री डा। विमला राई पौडेललाई जेनेभा जानबाट रोकेर सरकारबाट गलहत्याउने प्रकृया शुरु गरेका हुन् ।

प्रधानमन्त्री प्रचण्डले मन्त्री पौडेललाई आइतबार जेनेभा जान रोकिदिएका हुन् । परराष्ट्र मन्त्रालयले आइतबार सिंहदरबारमा पत्रकार सम्मेलन गरी मन्त्री पौडेल त्यसतर्फ प्रस्थान गर्न लागेको जानकारी दिएको थियो । तर अपरान्ह जेनेभातर्फ जान लागेकी पौड्याललाई प्रधानमन्त्रीले रोकिदिएपछि सरकारमा रहेका एमाले मन्त्रीहरुमा हलचल पैदा भएको छ ।

पछिल्लो राजनीतिक घटनाक्रमका कारण आफ्नो भ्रमण रोकेको हुन सक्ने उनले बताएकी छन् । ‘क्याबिनेटले मेरो भ्रमण पास गरिसकेको थियो। आज मात्रै डलर पनि साटिसकेकी थिएँ, यहाँबाट जेनेभा पुगेर मानवअधिकार परिषदको बैठकलाई सम्बोधन गर्ने तय भइसकेको थियो त्यहाँबाट दोहामा आउने कार्यक्रम थियो’, उनले भनिन । उनी जेनेभा जाने कार्यक्रम परराष्ट्रमन्त्रालयमा आइतवार सार्वजनिक गरेर अपरान्ह त्रिभुवन विमानस्थलतिर हिँड्न तयार भएपछि मूख्यसचिवले फोन गरेर प्रधानमन्त्रीको सन्देश सुनाएका थिए । उनको स्थानका नेकपा एसका कानुनी सल्लाहकार एवं पूर्व कानुनमन्त्री गोविन्द बन्दीलाई जेनेभा पठाइएको छ ।

पुष १० मा बनेको सात दलीय गठबन्धन छाड्दै प्रचण्डले कांग्रेससहितको आठ दलीय गठबन्धन बनाइसकेपछि एमालेलाई सरकारबाहिर राखेर कांगे्रसलाई सरकारमा ल्याउनका लागि यस्तो कदम चालेको स्रोतको दावी छ । शनिबार मात्रै प्रचण्डले एमालेले अब सरकार छाड्न सक्ने बताएका थिए ।

शुक्रबार बालुवाटारमा भएको आठ दलीय गठबन्धनको बैठकमा पनि उनले एमाले सरकारबाट बाहिरिने बताउँदै कांग्रेससहितलाई सत्तामा आउन भनेका थिए । ‘प्रधानमन्त्रीले कांग्रेसलाई सरकारमा ल्याउन चाहिरहनु भएको छ जसको परिणाम मन्त्रीलाई जेनेभा जानबाट रोकेर एमालेलाई चाडो सरकार छाडन एक प्रकारले दबाब दिनुभएको हो’, वालुवाटार निकट स्रोतले भन्यो । तर एमालेले शनिबार आगामी फागुन २५ सम्म सरकारबाट नबाहिरिने निर्णय गरिसकेको छ । एमालेसँगको खटपटबीच प्रचण्डले परराष्ट्रमन्त्रीको भ्रमण रोकिदिएपछि एमाले मन्त्रीहरुलाई सरकारमा बसिरहन नैतिक संकट परेको छ ।

मन्त्री पौडेललाई रोकेपछि अहिले साँझ मन्त्री क्वार्टर पुल्चोकमा एमाले मन्त्रीहरुको छुट्टै बैठक बसेको थियो । सो बैठकले पार्टीको निर्देशनपछि मात्रै सरकार छाड्ने निर्णय गरेका छन् । ‘अहिले प्रधानमन्त्रीकै गतिविधिलाई हामीले नियाली रहेका छौ, पार्टीले निर्णय गर्छ अनि हामी पनि निर्णय लिनेछौ’, पुल्चोकबाट एक मन्त्रीले भने ।