उपप्रधानसहित ९ मन्त्रालयमा कांग्रेसको दावी, नेतृत्वमा कोइराला कि खड्का ?

१६ फागुन, काठमाडौं । प्रधानमन्त्री पुष्पकमल दाहाल ‘प्रचण्ड’ले मन्त्रिपरिषद विस्तारबारे छलफल सुरु गरेका छन् । प्रधानमन्त्री प्रचण्ड र नेपाली कांग्रेसका सभापति शेरबहादुर देउवाबीच भएको अनौपचारिक छलफलमा कांग्रेसले उपप्रधानसहित ९ मन्त्रालयमा दावी गरेको छ भने प्रधानमन्त्री प्रचण्डले उपप्रधानसहित ७ मन्त्रालय लिन आग्रह गरेको स्रोतको भनाइ छ ।

नेकपा एमाले, राप्रपा र राष्ट्रिय स्वतन्त्र पार्टी सरकारबाट बाहिरिएसँगै प्रधानमन्त्री प्रचण्डले अहिले १६ मन्त्रालयको जिम्मेवारी आफैले लिएका छन् । फागुन २५ गते हुने राष्ट्रपतिको निर्वाचनलाई लिएर पुष १० गतेको गठबन्धन भत्किएर नयाँ गठबन्धन बनेपछि कांग्रेस सरकारमा जाने तयारीमा छ । बाँकी जनता समाजवादी पार्टी, नेकपा एकीकृत समाजवादी, जनमत पार्टी, नागरिक उन्मुक्ति पार्टी, लोकतान्त्रिक समाजवादी पार्टी र राष्ट्रिय जनमोर्चालाई पनि सरकारमा सहभागी गराउनु पर्ने छ ।

आठ दलीय गठबन्धनमा कांग्रेसले ९ मन्त्रालय दावी गरेको हो । पार्टीभित्रका अधिकांश शीर्ष नेताहरु नै सरकारमा जान इच्छुक देखिएपछि सभापति देउवाले पहिले पार्टीमा छलफल गरेर नाम दिने बताएको स्रोतको भनाइ छ । राष्ट्रपति निर्वाचन नजिकिएका कारण अन्य दलसँग मन्त्रिपरिषद विस्तारबारे छलफल भएको छैन् । कांग्रेसका एक नेताले बताएअनुसार कांग्रेसले राष्ट्रपतिको निर्वाचनपछि मात्र सरकारबारे छलफल गर्ने भने पनि प्रधानमन्त्री प्रचण्डले भने त्यस अगाडि नै सहमति जुटाएर जानुपर्ने भन्दै मन्त्रिपरिषद विस्तारप्रति चासो देखाएका छन् ।

कांग्रेसले अर्थ मन्त्रालयल लिने र माओवादीले गृह मन्त्रालय राख्ने लगभग सहमति भइसकेको बताइएको छ । माओवादी केन्द्रले गृह मन्त्रालय राखेर कांग्रेसले अर्थ पाउँदा त्यसमा को जाने भन्ने अर्को समस्या देखिएको छ । अर्थमा जान कांग्रेसका युवा नेताहरु आकांक्षी देखिएका छन् । मन्त्रालय मिलाउन गृह राज्यमा कांग्रेस र अर्थ राज्यमन्त्रीको रुपमा माओवादीले लिने मोटामोटी सहमति भएको बताइएको छ । अर्थमा जान पार्टी प्रवक्तासमेत रहेका डा.प्रकाशशरण महत, ज्ञानेन्द्र कार्की र उदय शमशेर जबराले चासो देखाएका छन् ।

कांग्रेस सरकारमा जाँदा शेखर कोइराला समूहले ४० प्रतिशत दावी गरेको छ । तर, सभापति देउवाले कोइरालासँग अहिलेसम्म सरकारमा सहभागी हुने विषयमा छलफल चलाएका छैनन् । संस्थापन पक्षबाट उपसभापति पूर्णबहादुर खड्का नगए इतर समूहको नेतृत्व गरेका नेता डा. शेखर कोइराला उपप्रधानसहित परराष्ट्रमन्त्री भएर कांग्रेसको नेतृत्व गर्ने विषयमा पनि छलफल भइरहेको स्रोतको भनाइ छ । कोइरालाले नेतृत्व गर्दा उपप्रधानसहित परराष्ट्र मन्त्रालयको नेतृत्व गर्ने छन भने उपसभापति खड्का गएमा कुन मन्त्रालय लिने भन्ने तय भएको छैन् ।

बालुवाटार निकट उच्च स्रोतका अनुसार कांग्रेसले अर्थ मन्त्रालयसहित ७ मन्त्रालय लिएर अन्य दुई राज्यमन्त्री लिनुपर्ने सर्त प्रधानमन्त्रीको छ । माओवादीले गृहसहित पाँच मन्त्री र दुई राज्यमन्त्री लिएर बाँकी मन्त्रालय अरु दललाई दिएर मिलाउने सोचमा प्रधानमन्त्री रहेका छन् ।कांग्रेसमा भने मन्त्री बन्ने आकांक्षीहरु धेरै देखिएका छन् । अर्थ मन्त्रालयमा अर्थतन्त्र बुझेको व्यक्तिलाई अघि सार्ने तयारी कांग्रेसको छ । स्रोतका अनुसार सभापति देउवाले खड्का वा कोइरालाको नेतृत्वमा सरकारमा मन्त्रीहरु पठाउने तयारी गरिरहेका छन् ।