राष्ट्रपतिको अभियान लिएर कांग्रेसका सात नेता पुगे सात प्रदेश

१८ फागुन, काठमाडौं । नेपाली कांग्रेस नेतृत्वमा बनेको आठदलीय गठबन्धनले सात प्रदेशमा गर्न लागेको सांसद अभिमुखीकरण प्रशिक्षण कार्यक्रमको नेतृत्व गर्दै कांग्रेस नेताहरु तोकिएको प्रदेशमा पुगेका छन् । आज बिहीबार राष्ट्रियसभा र प्रतिनिधिसभाका सांसदहरुलाई प्रशिक्षण दिएर गठबन्धनका दलहरुले भोली १९ गते शुक्रबार सात प्रदेशमा भेला राखेका छन् ।

सात प्रदेशका सांसदहरुलाई अभिमुखीकरण प्रशिक्षण दिन राखिएको यस कार्यक्रमको नेतृत्व नेपाली कांग्रेसले गरेको छ । यसका लागि कांग्रेसले सात वटै प्रदेशमा जिम्मेवारी दिएर नेताहरु खटाइसकेको छ । यस अभिमुखीकरण प्रशिक्षण कार्यक्रमको उदेश्य राष्ट्रपतिको निर्वाचन भएकाले उक्त प्रशिक्षणमा नयाँ गठबन्धन बन्नुको कारण, गठबन्धनका आगामी रणनीति र सरकारका आगामी कामबारे सांसदहरुलाई जानकारी दिइने बताइएको छ ।

कांग्रेसले राष्ट्रपतिमा आठ दलीय गठबन्धनका साझा उम्मेदवार एवं पार्टीका वरिष्ठ नेता रामचन्द्र पौडेललाई जिताउन सातवटै प्रदेशमा पार्टीका केन्द्रीय नेता खटाएको हो । फागुन २५ गते हुने राष्ट्रपतिको निर्वाचनमा पौडेललाई विजयी गराउन कांग्रेसले केन्द्रबाटै पदाधिकारीलाई खटाएको छ । बुधबार सभापति शेरबहादुर देउवाको निवास धुम्बाराहीमा बसेको पदाधिकारी एवं शीर्ष नेताको बैठकले गठबन्धनको कार्यक्रमलाई नेतृत्व गर्न पदाधिकारीलाई जिम्मेवारी दिइएको थियो ।

कांग्रेसले कोशी प्रदेशमा महामन्त्री विश्वप्रकाश शर्मालाई खटाएको छ भने मधेस प्रदेशमा सहमहामन्त्री फरमुल्लाहा मन्सुरलाई जिम्मेवारी दिएइको छ । बागमती प्रदेशमा महामन्त्री गगन थापा खटिएका छन् । यसैगरी गण्डकी प्रदेशमा उपसभापति धनराज गुरुङलाई कार्यक्रमको नेतृत्व गर्ने जिम्मेवारी दिइएको छ । लुम्बिनी प्रदेशको जिम्मेवारी सहमहामन्त्री किशोरसिंह राठोरले पाएका छन भने कर्णाली प्रदेशमा उपसभापति पूर्णबहादुर खड्कालाई खटाइएको छ ।

यस्तै सुदूरपश्चिम प्रदेशमा सहमहामन्त्री बद्री पाण्डेले जिम्मेवारी पाएका छन् । पदाधिकारीलाई जिम्मेवार दिएको काांग्रेसले सम्बन्धित प्रदेश सभापति र प्रदेश संसदीय दलको नेतालाई पनि कार्यक्रममा सहभागी हुन भनेको छ । भोली फागुन १९ गते हुने प्रदेशस्तरीय भेलामा प्रदेशसभा, प्रतिनिधिसभा र राष्ट्रियसभा सदस्य समेतको सहभागिता रहनेछ । निर्वाचनका लागि संघीय संसदमा हाल कायम रहेका ३३२ र प्रदेशसभाका ५५० गरी कुल ८८२ मतदाता रहेका छन् । यस कार्यक्रमको उदेश्य पनि गठबन्धनका साझा उम्मेदवार रामचन्द्र पौडेललाई जिताउनु रहेको छ ।