बंगलादेशमा हुने यू–१७ महिला च्याम्पियनसपिका लागि राष्ट्रिय महिला टोली घोषणा

२३ फागुन, काठमाडौंं । सार्क सदस्य राष्ट्र बंगलादेशमा मार्च २० देखि ३१ तारिखसम्म हुने साफ यू–१७ महिला च्याम्पियनसिप २०२३ का लागि नेपाली राष्ट्रिय महिला टोली घोषणा गरिएको छ ।

मुख्य प्रशिक्षक भगवती राना मगरले मंगलबार टोली घोषणा गरेकी हुन् । दक्षिण एसियाली फुटबल महासंघ (साफ)ले युईएफए असिस्ट प्रोग्रामअन्तर्गत प्रतियोगिता आयोजना गर्दैछ ।

अखिल नेपाल फुटबल संघ (एन्फा)ले प्रतियोगिताका लागि खेलाडी छनोट गर्न एन्फा कम्प्लेक्समा जनवरी २६, २७, ३१ र फेब्रुअरी १ र २ गते पाँच दिन खुला छनोटको आयोजना गरेको थियो ।

टोलीमा गोलकिपरमा सुजाता तामाङ, रधिला ओली, करुण बुढाथोकी रहेका छन् । डिफेन्डरमा अञ्जना पुन मगर, प्रेना डोल्मा लामा, सीता रोकाया, अमिता भुल, सिमरन राई, विपना स्नेही, रेनु लिम्बु चबेगु रहेका छन् ।

मिडफिल्डरमा माया मास्के, दीपा मगर, सुशीला केसी, झुमा विश्वकर्मा, सुक्रिया मिया, भावना परियार, पुनम चेम्जोङ छन् भने फरवार्डमा दीपा रोकाया, वर्षा ओली, सेनु परियार रहेका छन् ।

प्रशिक्षक राना मगरको नेतृत्वमा यू–१५ राष्ट्रिय महिला टोलीले बंगलादेशमा भएको साफ यू–१५ महिला च्याम्पियनसिपको ऐतिहासिक उपाधि जितेको थियो ।