भ्रष्टाचार मुद्दामा सांसद गुरुङ दोषी ठहर, १ करोड २१ लाख जरिवाना फैसला

२५ फागुन, काठमाडौं । नेपाली कांग्रेसका निलम्बित सांसद टेकबहादुर गुरुङ भ्रष्टाचार मुद्दामा दोषी ठहर भएका छन् । उनलाई विहीबार विशेष अदालतले दोषी ठहर गर्दै जरिवाना समेत तोकेको छ ।

विशेष अदालतका अध्यक्ष श्रीकान्त पौडेल, सदस्य शालिग्राम कोइराला र बलभद्र बास्तोलाको इजलासले सजाय निर्धारण गर्दै विशेष अदालतले गुरुङलाई एक करोड २१ लाख ८४ हजार रूपैयाँ जरिवाना सुनाएको हाे । पर्यटनमन्त्री हुँदा भृकुटीमण्डपस्थित फनपार्कको जग्गा सस्तोमा भाडामा दिएर भ्रष्टाचार गर्न मतियारको भूमिका निर्वाह गरेको विशेष अदालतले ठहर छ ।

अख्तियार दुरुपयोग अनुसन्धान आयोगले २०७५ माघ २१ गते १४ जना जनाविरुद्ध दायर गरेको भ्रष्टाचार मुद्दामा गुरुङसहित ९ जनालाई अदालतले दोषी ठहर गरेको छ ।

भृकुटीमण्डपको ६० रोपनी जग्गा प्रतिमहिना ५ लाख ५५ हजार रुपैयाँ भाडामा १० वर्षका लागि फनपार्कलाई दिने निर्णयमा गुरुङको संलग्नता पुष्टि भएपछि जरिवाना सजाय तोकिएको हो । मनाङबाट निर्वाचित सांसद गुरुङ यही मुद्दाका कारण निलम्बित अवस्थामा छन् । सोही कारण आज भएको राष्ट्रपति निर्वाचनमा सहभागी हुन पाएनन् ।

दाेषी ठहर भएका गुरुङ कुनैबेला म्यानपावर कम्पनी खोलेर वैदेशिक राजगारमा नेपाली कामदारलाई पठाउने काममा समेत सक्रिय थिए ।