द्वन्द्वका पीडितलाई न्याय अदालतबाट संभव छैन : प्रभु साह

२८ फागुन, काठमाडौं । आम जनता पार्टीका अध्यक्ष प्रभु साहले द्वन्द्वकालीन घटना अदालतमा पुर्याउने विषयलाई मुलुकलाई प्रतिगमनतर्फ लैजाने तत्वहरु सक्रिय भएको प्रमाणको रुपमा लिनुपर्ने बताएका छन् ।

सरकारको नेतृत्व गरिरहेको माओवादी केन्द्रसहित माओवादी धारका ९ घटकहरुले काठमाडौंमा आयोजना गरेको पत्रकार सम्मेलनमा बोल्दै सांसद समेत रहेका अध्यक्ष साहले द्वन्द्वका घटनामा अदालतले हात हाल्न नहुने बताए । उनले सर्वोच्चका प्रमुखले प्रधानमन्त्री प्रचण्डविरुद्ध परेको मुद्दालाई सरकारले टुंग्याउनपर्ने विषय भएको वक्तव्य दिनुपर्ने बताए ।

यदि मुद्दालाई सामान्य फौजदारी कानूनमा टेकेर अगाडि बढाए मुलुकमा अस्थिरता र प्रतिगमन चाहने पक्षलाई फाइदा पुग्ने बताउँदै अध्यक्ष साहले संक्रमणकाली सम्बन्धी बाँकी सम्पूर्ण सत्य निरुपण तथा मेलमिलाप आयोगमार्फत टुंगोमा पुर्याउनुको विकल्प नरहेको बताए ।

उनले प्रधानमन्त्री वा माओवादीका नेताविरुद्ध द्वन्द्वकालीन मुद्दा उठाएको भरमा संक्रमणकालीन न्याय निरुपण नहुने बताए । मुलुकलाई द्वन्द्वतर्फ लैजाने षडयन्त्रविरुद्ध सबै जना एकजुट हुनुपनमाउनले जोड दिए ।