युरिया मल प्रतिकेजी १४ बाट २५ रुपैयाँ पुर्याइयो

२९ फागुन, काठमाडौं । सरकारले रासायनिक मलमा ११.७८ प्रतिशतले अनुदान कटौती गरेको छ । रासायनिक मलको अन्तर्राष्ट्रिय मूल्य बढेको छ र नेपाली मुद्राको विनियमदरमा कमी आएकोले मलमा दिँदै आएको अनुदान घटाएको कृषि तथा पशुपन्छी विकास मन्त्रालयको जनाएको छ ।

कृषकले ७०.८२ प्रतिशत अनुदान पाउँदै आएकामा अबदेखि ५९.०४ प्रतिशत मात्र अनुदान पाउनेछन् । यसलाई ५० प्रतिशतमा झार्ने समेत जनाइएको छ । योसँगै अब युरियाको मूल्य १४ बाट बढाएर २५ रुपैयाँ पुर्याइएको छ ।

डिएपीको ४३ बाट ५० र पोटास ३१ बाट ४० रुपैयाँ पुर्याइएको छ । देशभर मलको चर्को अभाव भइरहेको बेला सरकारले मूल्य बढाएको हो । २६ फागुन अघिको मूल्यमा वृद्धि गरिएकाे मन्त्रालयका प्रवक्ता प्रकाशकुमार सञ्जेलले बताए ।