प्रेम आचार्यको आत्मदाह घटनाका प्रतिवेदन बुझाइयाे

२९ फागुन, काठमाडौं । गएको माघ १० मा नयाँबानेश्वरस्थित संसद भवनको दक्षिण गेटअगाडि इलामका व्यवसायी प्रेमप्रसाद आचार्यले आफैंलाई पेट्रोल छर्केर आगो लगाएर आत्मदाह गरेको घटनामाथि छानबिन गर्न बनेको समितिले प्रतिवेदन बुझाएकाे छ ।

समिति संयोजक मन्त्रालयका सहसचिव नारायणप्रसाद रिसाल नेतृत्वको समितिले गृह सचिव विनोद प्रकाश सिंहलाई सोमबार प्रतिवेदन बुझाएको हो । आत्महत्या गर्न बाध्य बनाउने नीतिगत व्यवस्थामा व्यापकरुपमा सुधार्न प्रतिवेदनमा २३ बुँदे सुझाव दिइएएको छ ।

प्रेम प्रसादले उठाएको विषय र नीतिगत व्यवस्थाका कारण नागरिकलाई समस्या परेको औल्याइएको छ । व्यवसायमा गरिने उधारो कारोबारलाई हटाउन र कृषिजन्य उत्पादनमाथिको कर हटाउनुपर्ने सुझाव दिइएको छ ।

ऋण लिँदा कृषिजन्य जग्गाको मूल्यांकन कम र अन्य जग्गाको धेरै गर्ने नीतिमा व्यापक सुधार गर्नुपर्ने सुझाव समितिले दिएको । मृतकले नाम लिएका पात्रहरूविरूद्ध मुद्दा चलाउने वा नचलाउनेबारे प्रतिवेदनको विस्तृत अध्ययनपछि मात्र टुंगो लाग्ने गृह स्रोतले बतायो ।

आचार्यले आफूसँग सामन लिएर पैसा नदिएको भनी नाम लिएका भाटभटेनी सुपर मार्केका संचालक मिनबहादुर लगायतसँग समितिले बयान लिएको थियो ।