रामपुर क्याम्पसको सभापतिमा आशिष देवकोटाले गरे उम्मेदवारी दर्ता

२९ फागुन, काठमाडौं । त्रिभुवन विश्वविद्यालय ‘त्रिवि’को स्वतन्त्र विद्यार्थी युनियन ‘स्ववियु’ निर्वाचनको लागि देशभरका क्याम्पसमा उम्मेदवारी दर्ता भएको छ । आगामी चैत ५ गते हुने निर्वाचनका लागि उपत्यकासहित देशभरिका त्रिवि आङ्गिक र सम्बन्धन प्राप्त क्याम्पसमा उम्मेदवारी दर्ता भएका हुन् ।

यसैबीच स्वतन्त्र विद्यार्थी युनियन रामपुर क्याम्पसको सभापतिमा नेपाल विद्यार्थी संघ रामपुर क्याम्पस इकाई सभापति आशिष देवकोटाले उम्मेदवारी दर्ता गरेका छन्। उनको विपक्षीमा नेकपा एमाले र नेकपा माओवादीका साझा उम्मेदवार दिवस पौडेल रहेका छन् ।

कार्यतालिका अनुसार स्ववियु निर्वाचनका लागि मतदानको समय चैत ५ गते बिहान ८ बजेदेखि दिउँसो ४ बजेसम्म तोकिएको छ । स्ववियु निर्वाचनको प्रचार–प्रसार फागुन २९ गतेदेखि चैत २ गते राति १२ बजेसम्म समय तोकिएको छ । त्रिविमा २८ वर्ष उमेरहद र मिश्रित निर्वाचन प्रणालीमा निर्वाचन गर्न लागिएको हो । निर्वाचन देशभरिका त्रिविमा ६२ आङ्गिक र एक हजार ४० सम्बन्धन प्राप्त क्याम्पसमा निर्वाचन हुँदैछ ।

नेबिसंघबाट स्ववियु निर्वाचनमा सभापतिमा आशिष देवकोटाकाे नेतृत्वमा सचिव विवेक अर्याल, कोषाध्यक्षमा समिक्षा बस्नेत रहेका छन्, सदस्यहरूमा गोकुल प्र. शर्मा, दिक्षा अधिकारी, सन्देश बोहरा, वर्षा सुवेदी र मुना पोख्रेलसहित १५  सदस्यीय कार्यसमिति दर्ता गराइएकाे छ ।