वीरगञ्जमा जातीय छुवाछुत घटनाको विरोधमा प्रदर्शन

२९ फागुन, वीरगञ्ज । वीरगञ्जमा एक धार्मिक कार्यमा विभेद गरिएको भन्दै प्रदर्शन भएको छ । अलौमा चैत ८ देखि १७ गतेसम्म गर्न लागिएको शतचण्डी महायज्ञमा दलित समुदायलाई विभेद गरेको प्रदर्शनकारीको आरोप छ ।

पूजा समितिले दलित समुदायलाई पूजामा सहभागी हुन नदिने भनेर छुवाछुत र विभेद गरेको भन्दै उनीहरुले जिल्ला प्रशासन कार्यालय अगाडि विरोध जनाएका छन् । ‘दलित समुदायमाथि अत्याचार, दलितले मन्दिरमा पूजा गर्न किन मिल्दैन ?’ जस्ता नारा लेखिएको प्लेकार्ड बोकेर प्रदर्शनमा उत्रिएका छन् । पूजाका लागि रमेश चौधरीको संयोजकत्वमा ३५ सदस्यीय समितिमा सुरुमा दलित समुदायको समेत नाम राखिएकोमा पछि हटाइएको उनीहरुको भनाइ छ ।

प्रदर्शनपछि दलित अगुवाहरुले यज्ञमा सहभागी हुन नदिने भनेर विभेद गरेको भन्दै जिल्ला प्रशासन कार्यालय पर्सामा उजुरी दिएका छन् । दलित समूदायका प्रदर्शनकारीहरुले यसअघि भोजमा दलित समूदायलाई अलग्गै राखेर भोज खुवाइएको घटनामा सिरहाको भगवानपुर गाउँपालिकाका अध्यक्ष उग्रनारायण यादवमाथि पनि कारबाहीको माग गरेका छन् । यद्यपि अध्यक्ष यादवले घटनामा माफी मागिसकेका छन् ।

उनले आफ्नी दिवंगत आमाको १३औं दिनको तिथि आयोजना गरिएको भोजमा विभिन्न समूदायका लागि भनेर पोष्टर नै टाँसेर भोजवस्थल छुट्याएका थिए । त्यसपछि उनको चर्को विरोध भइरहेको छ ।