माओवादी केन्द्रको मधेश कमिटीमा विवाद चकिँदै, कमिटीकाे बैठकमा गएनन् मातृका यादव

३० फागुन, काठमाडौं । नेकपा (माओवादी केन्द्र) का उपमहासचिव मातृका यादव पार्टीको मधेश प्रदेश कमिटीको बैठकमा अनुपस्थित भएका छन् । गएको शुक्रबारदेखि मुख्यालय पेरिसडाँडामा माओवादी मधेश प्रदेश कमिटीको ३ दिनसम्म चलेको बैठकमा यादवले बैठकलाई बहिष्कार गरेका हुन् ।

मधेस प्रदेश कमिटीमा आन्तरिक विवाद चर्किएको छ । सोही कारण प्रदेश कमिटी समेत गठन हुन सकेको छैन । पार्टीले प्रदेशका इन्चार्जको रुपमा गणेश साहलाई तोकको छ ।

कमिटी बन्न नसक्दा यो प्रदेशमा २ महिने संगठन विस्तार र शुदृढिकीकरण अभियान समेत ठप्प प्रायः छ । प्रदेशमा यो अभियान पूरा भएपछि जिल्ला र स्थानीय तहका कमिटीलाई पूर्णता दिने तयारी माओवादी केन्द्रको छ ।

यादव अनुपस्थित पेरिसडाँडाको बैठकमा मधेश प्रदेश कमिटीका केही पदाधिकारी, स्थायी समिति, केन्द्रीय सदस्य र प्रदेश सदस्यहरू सहभागी थिए ।

यादव बैठकमा यादव सहभागी नभएकाे विषयमा अध्यक्ष प्रधानमन्त्री पुष्पकमल दाहालले आक्रोश पोखेका थिए । प्रभाव जमाउने विषयमा  मधेश प्रदेशमा यादव र गिरिराजमणि पोखरेलबीच तिक्तता छ ।