सभामुखको अभिव्यत्ति र व्यवहारप्रति प्रतिनिधिसभामा उठ्यो प्रश्न

५ चैत, काठमाडौं । प्रतिनिधिसभाका सभामुख देवराज घिमिरेले सार्वजनिक रुपमा दिएका अभिव्यक्ति र बैठकमा देखाएको भुदभावपूर्ण व्यवहारप्रति सांसदहरुले प्रश्न उठाएका छन् । सभामुख घिमिरेले पत्रकार बिक्रीमा छन भन्दै दिएको अभिव्यक्ति र बैठकभित्र ठूला र साना दलका सांसदप्रति गरिएको व्यवहारलाई लिएर उनीमाथि प्रश्न उठेको हो । नेपाली कांग्रेसका सांसद रामहरि खतिवडाले सभामुखका अभिव्यक्तिलाई लिएर प्रश्न यसलाईसच्याउनु पर्ने वा प्रमाणित गर्नु पर्ने माग राखेका छन् ।

सभामुख घिमिरेले पत्रकारहरुमाथि लगाएको गम्भीर आरोपबारे नेपाल मजदुर किसान पार्टीका सांसद प्रम सुवालले पनि संसद बैठकमा मा प्रश्न उठाएका छन् । आइतबार प्रतिनिधिसभाको बैठकमा बोल्दै नेपाली कांग्रेसका सांसद रामहरि खतिवडाले पत्रकार र पत्रकारिताबारे अभिव्यक्ति दिंदा त्यसले प्रेस स्वतन्त्रतामाथि परेको आघातको बारेमा सोचिएको छ कि छैन भनी प्रश्न गरे ।

उनले भने, ‘सम्माननीय सभामुख पत्रकार बिक्रीमा छन् भन्ने अभिव्यक्ति दिएर चर्चामा हुनुहुन्छ । व्यवस्थापिकाको प्रमुखले नै यस्तो अभिव्यक्ति दिंदा प्रेस स्वतन्त्रतामाथि परेको आघातको बारेमा सोचिएको छ कि छैन ? त्यतातिर पनि ध्यान जाओस् ।’ नेपाल मजदुर किसान पार्टीका सांसद प्रेम सुवालले पनि सभामुखको अभिव्यक्ति सार्वजनिक महत्वको विषय हुने भन्दै ध्यानाकर्षण गरे ।

उनले भने, ‘पत्रकारहरुकोबारे अध्ययन गरेर भन्नुभएको भए छानबिन समिति बनाउनु पर्यो । कुन–कुन हो पित पत्रककारिता गर्ने ? । यो सार्वजनिक महत्वको विषय हुन्छ सभामुखबाट उठेको विषय हो ।’ सभामुखको अभिव्यक्तिलाई लिएर संसदले छानबिन समिति बनाउनुपर्ने सांसद सुवालको आग्रह छ ।

चैत ३ गते नेपाल पत्रकार महासंघका प्रतिनिधिहरुसँगको भेटमा सभामुख घिमिरेले पत्रकारहरु बिक्रीमा रहेको भनी गम्भीर आरोप लगाएका थिए । यसअघिको एक कार्यत्रममा पनि उनले महिलाहरुलार्य पत्रकारले महत्व नदिएको बताएका थिए । महासंघका प्रतिनिधिसँगको भेटमा उनले भनेका थिए, ‘पत्रकारहरुले जति जिम्मेवारीका साथ पत्रकारिता गर्नुपर्दथ्यो, त्यो खालको छैन् । पीत पत्रकारिता अहिले पनि निकै डरलाग्दो छ । जे जे कारणले भए पनि तिनीहरु प्रभावित छन् । अझ भन्ने हो भने बिक्रीमा छन् पत्रकारहरु ।’

पत्रकारहरुको छाता संगठन नेपाल पत्रकार महासंघमा प्रतिनिधिहरुकै अगाडि सभामुख घिमिरेले अझ अगाडि बढेर भनेका थिए, ‘पत्रकारहरु बिक्रीमा छन् । संघ (पत्रकार महासंघ) बिक्रीमा छ भन्यो सभामुखले भन्लान् कि भनेर मैले रोकिराख्नु पर्दैन ।’ तर, उनको यो गम्भीर आरोपलाई लिएर सरोकारवालाहरुले आपत्ति जनाउँदै आएका छन् । नेमकिपाका सांसद प्रेम सुवालले प्रतिनिधिसभा बैठकलाई ‘संसद हो कि क्लब’ भनी प्रश्न पनि गरेका छन् ।

‘संवैधानिक परिषद् (काम, कर्तव्य, अधिकार र कार्यविधि) सम्बन्धी ऐन, २०६६ लाई संशोधन गर्न बनेको विधेयक’को विरोधको सूचना फिर्ता लिने कि नलिने भन्ने चरणको छलफलका क्रममा उनले यस्तो बताएका हुन् । सभामुख घिमिरेले आफनो विरोधको सूचना फिर्ता लिने कि नलिने भनी निर्णय सुनाउन सांसद सुवाललाई समय दिएका थिए । तर, सुवालले किसानले मल नपाएको लगायत जनजीविकाको विषय उठाए । त्यसपछि सभामुख घिमिरेले विषयमा केन्द्रित हुन आग्रह गरे ।

जवाफमा सांसद सुवालले भने, ‘जनताको प्रतिनिधि हो । जनताको कुरा सुनिँदैन भने संसदबाट प्रधानमन्त्री चुन्नुको अर्थ हुँदैन । किसानले मल पाइराखेका छैनन् । बोलिरहँदा सभामुखले क्रस गर्न पाइँदैन । यो के हो यो ? संसद हो कि क्लब हो । क्लब भए क्लबको सामान ल्याउनुपर्याे, गित गाउनुपर्याे, नाच्ने गाउने आउनुपर्यो । होइन भने संसदको नियम पालना हुनुपर्याे । ठूला दलका सांसद लाई धेरै र साना दलका सांसदलाई थोरै समय दिने नियमा नियमावलीमा छैन । यस्तो भेदभावपूर्ण व्यवहार देखाउन पाइदैन । ’