आजदेखि एसईई सुरु हुँदै, परीक्षामा करिब ५ लाख परीक्षार्थी सहभागी

१७ चैत, काठमाडौं । आजदेखि माध्यमिक शिक्षा परीक्षा ‘एसईई’ सुरु हुँदै छ । परीक्षा अहिले बिहान आठ बजेदेखि सुरु हुनेछ । एसईई परीक्षामा करिब ५ लाख परीक्षार्थी सहभागी भएका छन ।

राष्ट्रिय परीक्षा बोर्डका अनुसार करिब २ लाख ६० हजार छात्र र करिब २ लाख ५५ हजार छात्राले एसईई परीक्षा दिँदैछन् । परीक्षा चैत २९ गतेसम्म चल्ने बोर्डले जनाएको छ ।

राष्ट्रिय परीक्षा बोर्डका अनुसार यस वर्ष जापानबाट पनि १४ परीक्षार्थीहरु एसईईमा सहभागी हुनेछन् । वैदेशिक रोजगारीमा रहेका नेपालीका छोराछोरीहरुले जापानबाटै परीक्षा दिन लागेका हुन् । जापान सरकारको अनुमति लिएर नेपाली पाठ्यक्रम पढाइरहेका विद्यालयका विद्यार्थीहरु एसईईमा सहभागी हुन लागेको बोर्डले जनाएको छ ।

एसईई परीक्षाका लागि ७७ जिल्लामा २ हजार ३६ परीक्षा केन्द्र निर्धारण गरिएको छ । सबैभन्दा बढी परीक्षा केन्द्र बागमती प्रदेशमा छन् । बागमती प्रदेशका १ लाख ६ हजार ९५९ परीक्षार्थीका लागि ४३४ परीक्षा केन्द्र तोकिएको छ । यो बर्ष सबैभन्दा कम परीक्षार्थी र परीक्षा केन्द्र कर्णाली प्रदेशमा छन् । कर्णालीमा ४१ हजार ३२९ परीक्षार्थी र १७९ परीक्षा केन्द्र छन् ।