नाबालिगमाथि सामूहिक बलात्कारको आरोपमा धापासीबाट २ युवक पक्राउ

२१ चैत, काठमाडौं । एक नाबालिगमाथि सामूहिक बलात्कार गरेको आरोपमा प्रहरीले धापासीबाट दुई युवकलाई प्रहरीले पक्राउ गरेको छ ।

पक्राउ पर्नेहरुमा सिन्धुपाल्चोक मेलम्ची नगरपालिका–३ घर भई काठमाडौंको टोखा नगरपालिका–६ धापासी बस्दै आएका २१ वर्षका निमा तामाङ र काभ्रेपलाञ्चोक महाभारत गाउँपालिका–७ घर भई टोखाको सोही स्थान बस्दै आएका २१ बर्षका कुशल श्रेष्ठ रहेको प्रहरीले जनाएको छ ।

तामाङले आशिष तामाङ नामबाट नक्कली फेसबुक आईडी खोलेर पीडितलाई साथी बनाएर नजिकको सम्बन्ध बनाएर गत फागुन ६ गते काठमाडौंको टोखामा भेटी कुशलसहितले ग्राण्डी अस्पतालनजिक रहेको गेष्ट हाउसमा लगेर सामूहिक बलात्कार गरेको खुलेको प्रहरीको दाबी छ ।

उनीहरुलाई जाहेरीको आधारमा सोमबार मात्र काठमाडाैं उपत्यका अपराध अनुसन्धान कार्यालयको टोलीले धापासीबाट पक्राउ गरेको जनाइएको छ ।

पक्राउ परेका दुवैजनालाई थप अनुसन्धानका लागि जिल्ला अदालतबाट म्याद थप गराई महानगरीय प्रहरी वृत्त महाराजगञ्ज राखिएको छ ।