देउवाविरुद्ध छुट्टै समूहको मोर्चाबन्दी : प्रकाशमानको घरमा पौडेल,सिटौलाको भेला !

काठमाडौं । नेपाली कांग्रेसभित्र यतिबेला सभापति शेरबहादुर देउवाविरुद्ध अर्को समूहले मोर्चाबन्दी सुरु गरेको छ । पछिल्लो समय देउवाविरुद्ध बरिष्ठ नेता रामचन्द्र पौडेल समूहले छुट्टै मोर्चाबन्दी कसेको यथावत नै छ । अहिले फेरि पौडेल समूहलाई पार्टीका प्रभावशाली नेता कृष्णप्रसाद सिटौला समूहले पनि साथ दिएको छ ।

दुवै समूह सामूहिक रुपमा गोप्य छलफलमा जुटेका छन् । देउवाले पार्टीमा विधि र विधान नमानेको तथा एकलौटी ढंगले अघि बढेको उनीहरुको आरोप छ ।

बहुमतका आधारमा पेलेर विधान बनाएको र एकलौटी ढंगले अनुशासन समिति गठन गर्न खोजेको भन्दै पौडेल पक्ष आन्तरिक छलफलमा जुटेका हुन्।

नेता प्रकाशमान सिंहको घरमा वरिष्ठ नेता पौडेल, महामन्त्री डा. शशांक कोइराला, कोषाध्यक्ष सितादेवी यादव, पूर्व महामन्त्री कृष्ण सिटौला, केन्द्रीय सदस्य अर्जुननरसिंह केसी, डा. शेखर कोइराला, कमला पन्त, डा. मिनेन्द्र रिजाल, प्रदीप पौडेललगायत नेता छलफलमा जुटेका छन् ।

मंगलबार हिजोमात्र नेपाली कांग्रेस केन्द्रीय समितिले महासमिति बैठकको भावनाविपरित विधान पास गरेको भन्दै जिल्ला सभापतिहरू असन्तुष्ट बनेको समाचार बाहिरिएसंगै देउवाविरुद्ध अर्को समूहले मोर्चाबन्दी सुरु गरेको हो ।

असन्तुष्ट बनेका ५६ जिल्लाका सभापतिहरुले तत्काल निर्णय नसच्याए विशेष महाधिवेशन बैठक बोलाउने समेत चेतावनी दिएका छन ।

महासमिति बैठकबाट पास भैसकेको बिषयलाई केन्द्रीय कार्यसमितिको पछिल्लो बैठकले उल्टाएपछि ५६ जिल्लाका सभापतिहरु आक्रोशित बनेका हुन् ।