फरार थुनुवामध्ये दुई जना अझै पक्राउ परेनन्

२६ चैत, काठमाडौं । मधेश प्रदेशमा प्रहरीको नियन्त्रणमा रहेका बेला फरार भएका दुई थुनुवा अझै पक्राउ पर्न सकेका छैनन् । 

३ महिनामा मात्रै धनुषा र महोत्तरीबाट गरी हिरासतका थुनुवा फरार घटना ३ पटक भइसकेका छन् । तीन घटनामा ८ जना थुनुवा फरार भएका थिए । जसमध्ये ६ जनालाई प्रहरीले पुनः पक्राउ गरिसकेको छ । अन्य २ जना भने अझै फरार छन् । 

गत माघ १६ गते राति धनुषाको ईलाका प्रहरी कार्यालय महेन्द्रनगरको हिरासत कक्ष फोडेर फरार भएका ६ जना अभियुक्तमध्ये पाँच जनालाई प्रहरीले पक्राउ परेपनि २५ वर्षीय रोशन यादव अझै पक्राउ परेका छैनन् । 

फरार थुनुवाबारे अनुसन्धान नजिक पुगेपनि पटक–पटक ठाउँ परिर्वतन गर्दै आएका कारण पक्राउ पर्न नसकेको धनुषाका एसपी विश्वराज खड्काको भनाइ छ । 

यस्तै, मोहत्तरीमा उपचारका लागि अस्पतालबाट अर्का थुनुवा शुक्रबार फरार भएका लोहरपट्टी नगरपालिका–९ खुट्टापिपराढीका कृष्णा यादवलाई पक्राउ गर्न सकेका छैनन् । 

कर्तव्य ज्यान कसुरका अभियुक्त यादव जनकपुरधामको आर्या हस्पिटलको शौचालयको झ्याल फोडेर फरार भएका थिए ।