अझै उठेन शितलनिवास र सिंहदरबारको फोहोर

२९ चैत, काठमाडौं । सोमबारदेखि राष्ट्रपतिको कार्यालय शितलनिवास, प्रधानमन्त्री निवास बालुवाटार र मुख्य प्रशासनिक केन्द्र सिंहदरबारको फोहोर अझै उठन सकेको छैन । 

नीतिगत रुपमा उठाउने जिम्मा पाएको काठमाडौं महानगरपालिकाले फोहोर नउठाएको हो । उसले केन्द्र सरकारसँग विभिन्न माग राख्दै फोहोर उठाउन बन्द गरेको छ । महानगरका प्रमुख बालेन साहले केन्द्र सरकार, मन्त्रालय र विभिन्न निकायले महानगरको विकास र सफाइ अभियानमा सहयोग नगरेको भन्दै १४ बुँदे माग राखेका छन् । सो माग सोमबार बिहान प्रधानमन्त्री प्रचण्ड, उपप्रधान एवं गृहमन्त्री नाराष्णकाजी श्रेष्ठलाई बालुवाटारमा भेट गरी मागबारे अवगत गराएका थिए । 

त्यसपछि पनि मागप्रति सरकार पूर्ण बेवास्ता रहेको भन्दै बुधबार पनि फोहोर उठाएका छैनन् । महानगरबाट फोहोर उठाउने ठेक्का पाएको परिवर्तन नेपाल प्रा.लि.का संचालक मित्र घिमिरेले महानगर प्रमुख साहकै निर्देशनमा फोहोर नउठाएको प्रतिक्रिया दिएका छन् । 

ती क्षेत्रमा फोहोर कार्यालयबाट उठाएर बाहिर ल्याएर सडक छेउमा राखिएको छ । त्यहाँबाट नउठ्दा दुर्गन्ध फैसिएको छ । सरकारको मन्त्रिपरिषदले मंगलबार मात्र बैठकबाटै निर्णय गरेर फोहोर उठाउन विषयमा साहलाई जिम्मेवारीबोध गरेर काम गराउन सचेत गराएको थियो । 

तैपनि साह टसमस भएका छैनन् । उनले महानगरभित्र फुटपाथ छेकिने गरी सुरक्षाकर्मीहरुको बिट कायमै राखिएको, वाग्मती किनारका अवैध सुकुम्वासी बस्ती हटाउन सरकारले बेवास्ता गरेको, फोहोर व्यवस्थापनमा शहरी विकास मन्त्रालयले गरेको सम्झौतालाई पालाना नगरेका जस्ता गुनासो गरेका छन् ।

फोहोर उठाउने र महानगरको मागबारे छलफल गर्न प्रधानमन्त्री प्रचण्डले तत्काल पहल गर्नुपर्ने माग सांसदहरुले गर्दै आएका छन् । मागबारे सरकार गम्भीर नभएसम्म फाेहाेर नउठाउने उनकाे अडान छ ।