ओली अस्वस्थ्य भएपछि तीन शीर्ष नेताहरुको बैठक स्थगित

१ वैशाख, काठमाडौं । प्रतिनिधिसभाका विषयगत समिति गठन र संसदमा विचाराधीन विधेयकमाथि सहमति खोज्न शुक्रबारका लागि बोलाइएको प्रमुख तीन दलका शीर्ष नेताहरुको बैठक स्थगित गरिएको छ । नेकपा एमालेका अध्यक्ष केपी शर्मा ओली अस्वास्थ्य भएपछि बैठक स्थगित गरिएको बताइएको छ ।  नयाँ वर्ष मनाउन क्रममा अरु शीर्ष नेताहरु व्यस्त हुनुपरेका कारण आज बैठक स्थगित गरिएको बताइएको छ । यसअघि भएका छलफलमा एक आपसमा सहमति कायम गरेर अगाडी बढ्ने बताइएको थियो । 

प्रमुख दलबीच मुख्यतया द्वन्द्वकालीन घटनासम्बन्धी सत्य  सत्यनिरुपण तथा मेलमिलाप आयोग र वेपत्ता पारिएका परिवारसम्बन्धी आगोग गठन सम्बन्धमा तयार पारिएको विधेयकमाथि तीन दलबीच सहमति हुन आवस्यक छ । यसमा सहमति खोज्न शीर्ष नेताहरुले यसअघि गरेको छलफल निचोड पुग्न सकेको थिएन् । यस्तै संवैधानिक परिषद गठन सम्बन्धी विधेयकमा पनि नेताहरुबीच विवाद छ । संवैधानिक परिषद गठन नहुँदा सर्वोच्च अदालतमा प्रधानन्यायाधीश नियुुक्ति लगायतका काम रोकिएका छन् ।  

संसदमा विचारधीन रहेका विधेयकहरुमाथि छलफल गर्न संसदीय समितिहरु पनि गठन भएका छैनन् । विषयगत समितिको सभापतिका लागि दलहरुबीच हानाथाप छ । संसदमा प्रतिनिधित्व गर्ने दलहरु धरै भएपनि मुलतः नेपाली कांग्रेस, नेकपा एमाले र नेकपा माओवादीबीच सहमति हुन आवश्यक छ । रहेका  संसदमा रहेका विचाराधीन विधेयक, संसदीय समिति गठन लगायतका विषयमा छलफल गर्न भनेर आज बस्ने भनिएको शीर्ष नेताहरुको बैठक स्थगित भएपनि यसमा हुने भनिएको सहमति पनि पर सरेको छ । 

यसअघि सभामुख देवराज घिमिरेको पहलमा प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एमालेका अध्यक्ष केपी शर्मा ओली र नेपाली कांग्रेसका सभापति शेरबहादुर देउवाबीच दुई पटक छलफल भइसकेको छ । थप छलफलका लागि सभामुखको सरकारी निवास बालुवाटरमा आज पनि सभामुख घिमिरेले निमन्त्रणा दिएका थिए । पहिले तोकिएको समयमा शीर्ष नेताहरु आउन नभ्याउने भएपछि दिउँसो १ बजे बैठक बस्ने तय भएको थियो । तर, त्यो बैठक स्थगित भएको छ । नेताहरुका अनुसार एमाले अध्यक्ष ओलीले आफू अस्वस्थ रहेको बताएपछि शीर्ष नेताहरुको बैठक स्थगित भएको हो । अर्को बैठकको मिति तय भएको छैन ।