बैंकहरुकाे मुनाफामाथि संसदमा उठ्याे प्रश्न

१२ वैशाख, काठमाडौं । मंगलबार बसेको प्रतिनिधि सभाको बैठकमा शून्य समयमा बोल्ने अधिकांश सांसदहरुले देशको आर्थिक अवस्थाबारे कुरा उठाएका छन् । 

प्रमुख प्रतिपक्षी नेकपा (एमाले)का सांसद भिमप्रसाद आचार्यले देशको अर्थतन्त्र जर्जरको अवस्थामा पुगेको बताउँदै बैंकहरुको नियमन गर्न सरकारको ध्यानाकर्षण गराए । 

अर्थतन्त्र आरोलो लागिरहेको बेला बैंकहरुले अर्बौ रुपैयाँ मुनाफा कमाएको विषयमाथि नियमन गर्न उनले माग गरे । बैंकरहरुको दबाबमा परेर नियमक निकाय नियमन नगरी मौन बसेको उनको आरोप थियो । मुलुकको अर्थतन्त्र संकटमा परिरहेको बेला नाफा कमाउने बैंकहरुको पाता फर्काउनुपर्ने बेला आएको भन्दै उनले आक्रोश पोखे ।

उनले वृद्धवृद्धाले भत्ता पाउने अवस्था गुमाउनुपर्ने अवस्थामा पुग्दा समेत सरकार वित्तीय संस्थाहरुको दबाब परेर बैंकमा थुप्रिएको पैसा बजारमा ल्याउन असफल भएको बताए । शिक्षक र प्रहरीको तलब रोकिएर दैनिकीमै समस्या पर्न थालेको बताउँदै उनले संकटग्रस्त अवस्थामा पुगेका उद्योगहरु संचालनको नीति ल्याउन माग गरे । बजारमा अराजकता मौलाएर गएको र चाँडो नियन्त्रण नगरे महंगी बढेर विकराल रुप लिने भन्दै चिन्ता व्यक्त गरे । कोरोना महामारीले बैंकलाई नछोएको देख्दा बैंकले कमाएको नाफामाथि शंका उब्जिएको बताए ।

सहकारीमाथि नियमित नियमन नगरेकै कारण बचतकर्ताको रकम डुब्ने क्रम नरोकिएको उनको भनाइ थियो । लघुवित्तले अराजकतवरले उठाएको चर्को ब्याजले ऋणीको उठीबास लागेको भन्दै नियमविपरीत ब्याज असुल्ने लघुवित्त संस्थालाई कानुनबमोजिम कारवाही गर्न समेत उनले सरकारको ध्यानाकर्षण गराए ।