अर्थतन्त्रलाई समाजवादकाे आधार निर्माणतर्फ लैजान सांसदहरुको माग

१३ वैशाख, काठमाडौं । राष्ट्रियसभामा बोल्ने सांसदहरुले मुलुकको अर्थतन्त्र समाजवादको आधारमा निर्माण गर्नेतर्फ लैजानुपर्ने बताएका छन् ।

बुधबार बसेको राष्ट्रियसभाको बैठकमा बोल्दै सांसद दनकुमारी साह ‘गरिमा’ले संविधानले समाजवादका आधारहरु निर्माण गर्नेतर्फ देशको अर्थतन्त्रलाई अघि बढाउनुपर्नेमा जोड दिइन् । 

‘सुदृढ अर्थतन्त्र निर्माणका लागि अल्पकालीन, मध्यकालीन र दीर्घकालीन नीति र योजना निर्माण गरी प्रभावकारी कार्यान्वयन गर्ने’ भन्ने जरुरी सार्वजनिक महत्वको प्रस्ताव पेस गर्दै सांसद साहले मुलुकलाई आत्मनिर्भर र सफल मुलुक बनाउन समाजवादी अर्थव्यवस्था बनाउनुको विकल्प नरहेको बताइन् । 

देशलाई मुलुक असफल हुनुबाट जोगाउनुपर्ने बताएकी उनले ओरालो लागेको अर्थतन्त्रलाई उकालो तिर लैजान र देशलाई असफल हुनबाट जोगाउनुपर्ने बताइन् । देशलाई श्रीलंका र पाकिस्तानको बाटोमा पुग्न नदिन सरकारले बेलैमा सोचेर नीति तथा कार्यक्रम ल्याउनुपर्ने बताइन् । राष्ट्रियसभाको जारी हिउँदे अधिवेशन अन्त्य गर्ने तयारीमा सरकार लागेको छ । सरकार अहिले आगामी आर्थिक वर्ष २०८०/८१ को बजेट तयार गरिरहेको छ ।

संवैधानिक व्यवस्था अनुसार वैशाखको अन्तिम साताभित्र दुवै सदनको वर्षे अधिवेशन बोलाउनुपर्ने व्यवस्था छ ।