विलासिताका वस्तुकाे आयात कटौती गर्न माग

१३ वैशाख, काठमाडौं । राष्ट्रियसभाको बुधबारको बैठकमा सांसदहरुले विलासिताको सामान आयातमा कटौती गर्न सरकारसँग माग गरेका छन् । 
सांसद प्रमिला कुमारीले आत्मनिर्भर अर्थ व्यवस्थाका लागि विशेष योजना बनाउन माग गर्दै विलासिताका वस्तु खरिदमा रकम खर्च रोकेर कृषि र उत्पादनमा लगानी बढाउनुपर्ने बताइन् । 

‘दिनानुदिन भ्रष्टाचार बढरिहेको अवस्थामा सरकारले आवश्यक आर्थिक रणनीति अपनाउनु जरुरी छ’ उनले भनिन्, ‘विचौलिया, भ्रष्टाचारी, दलाललाई पृष्ठपोषण दिने संस्थालाई पनि भत्काउनु जरुरी छ ।’ 

मुलुकको व्यापार घाटा बढिरहेको अवस्थामा नेपालको वैदेशिक मुद्राको सञ्चिति तीव्र गतिले आरोलो लाग्नु चिन्ताको विषय भएको बताइन् । आर्थिक संकटका कारण उद्योगधन्दा बन्द हुन लागेको अवस्थामा पनि उद्योगी व्यवसायीले ऋणको चर्को व्याज तिर्नुपर्ने अवस्था हटाउन सरकारसँग माग गरिन् । 

आत्मनिर्भर अर्थ व्यवस्थाका लागि विशेष योजना तर्जुमा गर्न, सार्वजनिक यातायातका साधनलाई प्रोत्साहित गर्दै सवारी साधन, इन्धन लगायत विलासिताका वस्तु आयातको परिणाममा कटौती गर्ने नीति ल्याउनुपर्नेमा जोड दिइन् ।