लुम्बिनीमा मुख्यमन्त्री चाैधरीसँगै ३ मन्त्रीको शपथ हुँदै

१५ वैशाख, दाङ । लुम्बिनी प्रदेशमा आज मुख्यमन्त्री र ३ मन्त्रीले पद तथा गोपनियताको शपथ लिँदैछन् । सरकारमा सहभागी मन्त्रीको नाम टुंगो लागेसँगै मुख्यमन्त्रीसँगै मन्त्रीहरुको शपथ हुने भएको हो । 

समाचार अनुसार नेकपा (माओवादी केन्द्र) बाट धनबहादुर मास्की लोसपाबाट सन्तेषकुमार पाण्डे र नाउपाबाट धर्मबहादुर चौधरीले मन्त्री पदमा शपथ लिँदैछन् । उनीहरु तीनै जनालाई बिनाविभागीय मन्त्रीमा शपथ खुवाइनेछ । मुख्यमन्त्री डिल्लीबहादुर चौधरीलाई प्रदेश प्रमुख अमिक शेरचनले शपथ खुवाउने कार्यक्रम छ ।

मास्की दाङ ३ (ख), पाण्डे रुपेन्देही ३ (क) र चौधरी बर्दिया २ (ख) बाट गत मंसिर ४ मा प्रदेशसभा सांसद निर्वाचित भएका थिए । एमाले नेतृत्वको सरकार ढलेपछि नेपाली कांग्रेसको नेतृत्वमा सरकार गठन भएको हो ।

सरकारलाई समर्थन गर्ने दलहरुबीच मन्त्रालय भागबण्डा मिल्न नसक्दा मन्त्रीहरुलाई मन्त्रालयको जिम्मेवारी तोक्न ढिलाई भएको छ । चाैधरी ८ दलकाे समर्थनमा बिहीबार मुख्यमन्त्री नियुक्त्रि भएका थिए ।