कपन घट्नाः निरा पाण्डेको हत्यारा झापाबाट पक्राउ

१७ वैशाख, काठमाडौं । प्रहरीले कपनस्थित निरा पाण्डेको हत्यामा संलग्न एक जना आरोपीलाई झापाको धुलावारीबाट पक्राउ गरेको छ  । प्रहरी उच्च स्रोतले दिएको जानकारी अनुसार झापाबाट विनोद विक नाम गरेको आरोपीलाई पक्राउ गरिएको भनिएपनि उनको सबै विवरण गोप्य राखेको छ । उनलाई प्रहरीले शनिवार राती पक्राउ गरेको र  आइतबार काठमाडौ ल्याउने प्रहरीको दावी छ । 

विगत १३ वर्षदेखि कपनको सरस्वतीनगरमा भाँडा पसल सञ्चालन गर्दै आएकी पाण्डेको  वैशाख ७ मा पसलमै हत्या भएको थियो । ‘झापाको धुलावारीबाट कोही आशंकित व्यक्ति पक्राउ भएको हो, काठमाडौ ल्याएर अनुसन्धान गर्नेछौ, अनुसन्धान पूरा भएपछि मात्रै एकिन साथ पाण्डेको हत्याराबारे सार्वजनिक गर्नेछौ’,  प्रहरी उच्च स्रोतले भन्यो । अनुसन्धानमा संलग्न अधिकृतहरुका अनुसार विनोद झापाकै स्थायी बासिन्दा हुन्, उनले किन निराको हत्या गरे भन्नेबारेमा प्रहरीले विस्तृत अनुसन्धान विवरण सार्वजनिक गर्ने भएको छ ।  

सो घटनाबारे अनुसन्धान गर्न प्रहरी प्रधान कार्यालयले केन्द्रीय अनुसन्धान ब्यूरोकी प्रहरी अतिरिक्त महानिरीक्षक 'एआईजी' किरण बज्राचार्यको नेतृत्वमा ११ सदस्यीय समिति गठन गरिएको थियो । समितिमा उपत्यका अपराध अनुसन्धान कार्यालय र जिल्ला प्रहरी परिसर काठमाडौंको टिम रहेको छ । उनको हत्यापछि अपराधी पक्राउ गर्न नसकेको भन्दै नेपाल प्रहरीको आलोचना भएको थियो । उनको हत्यापछि स्थानीय व्यापारीहरुले हत्यारा पत्ता लगाउन माग गर्दै आन्दोलन गरेका थिए ।